Aalisarneq pillugu niuffannerit marluk aappaagumut

- Pingaaruteqarpoq pingaartumik nunatsinni aalisartut aalisarnermi atortorissaarutitigut, umiatsiatigut assigisaatigullu ineriartortoqarneranut malinnaasinnaanissaat, taamaammat piniarneq aalisarnerlu pillugit niuffannissaq pilersaarutaareersoq taamaatinnagu aappaagumut pisussanngorlugu kinguartinneqarpoq. Taamaasilluni aalisarneq pillugu niuffannerit marluk aappaagu pisussanngussapput, aappaa nunatsinni allalu Aalborgimi, Palle Jerimiassen Avannaata Kommuniani borgmesteri kommunalbestyrelsip aggustip 20-ani ataatsimiinnerani oqarpoq.

Nappaatit tuniluunnissaannut isumannaallisaaneq pillugu Naalakkersuisut nalunaarutaat piniarneq aalisarnerlu pillugit niuffannissap kinguartinneqarneranut peqquterpiaavoq. Isumannaallisaanermi 2020-mi decembarip 31-iata tungaanut atuuttussaq naapertorlugu illup iluani aaqqissuussisoqartillugu amerlanerpaamik 100-t peqataasinnaatitaapput. Tamanna niuffannermi saqqummersitsisussanut 75-iusunut ikinnerpaamillu saqqummersitsinermi sulisunik marlunnik peqataatitaqartartunut naapertuutinngilaq. Tamatumalu saniatigut kommunit, KNAPK, aalisakkerinermik suliffeqarfiit allallu 150-t missaanniittut peqataatitaqartarput.

Aprilimi oktobarimilu niuffannissat
Piniarneq aalisarnerlu pillugit niuffannissap oktobarip qaammataani ingerlanneqartussaagaluartup aappaagu apriilimi pisussanngorlugu aningaasaqarnermut ataatsimiititaliap kinguartitsinissamik siunnersuuteqarnera kommunalbestyrelsimi aalajangernermut tunngaviuvoq.

Piniarneq aalisarnerlu pillugit niuffannissaq upernaaru pisussanngorlugu ulluliinerit aningaasaqarnermut ataatsimiititaliamit apeqquserneqarsimagaluarput. Taamaasineranimi kommunimut qinersisoqartussaammat kommunimi sulisut qinersereernerup kingorna ulapputeqartussaapput, piffissamilu tassani aamma påskimi nalliuttut pisussaallutik. Taamaakkaluartorli pilersaarusiortussat pisussanik piareersaasiorsinnaaniassammata piniarneq aalisarnerlu pillugit niuffannissap ullui aalajangiusimaneqarput.

Taamaasilluni piniarneq aalisarnerlu pillugit niuffannissaq apriilip 13-ianiit 15-iata tungaanut ingerlanneqartussanngorpoq, allalu Danfish International oktobarip 13-ianiit 15-iata tungaanut ingerlanneqartussanngorluni. Niuffannissallu marluk pillugit pilersaarutit aaqqissuisut Aalborg Kongres & Kulturcenterip nittartagaani takuneqarsinnaapput.

Taamaalilluni 1 million koruunit missingersuutinut ilanngunneqareersimasut aappaagu atorneqartussanngorlugit nuunneqarput. Aalborg Kongres & Kultur Center isumaqatigiissuteqarfigalugu niuffattoqarnissanut 600.000 koruunit immikkoortinneqarsimapput aammalu 400.000 koruunit timersortarfiup aammalu piorsarsimassutsikkut illorsuup Sermermiut aserfallatsaalineqarnissaannut missingersuutigineqarsimallutik.

Avannaata Kommunianit piniarneq aalisarnerlu pillugit niuffattoqarnissaanut 850.000 koruuninik atuereerpoq, taakkunannga 550.000 koruunit tupersuarmik saqqummersitsivissamik pisinermut atorneqarsimallutik 300.000 koruunillu suliniummik ataqatigiissaarisumut akissarsiaritinneqarsimallutik.

Allattoq: Káte Hansen, khan@avannaata.gl
Titartagaq: Aalborg Kongres & Kultur Center