Avannaata Kommuniani borgmesteri Palle Jeremiassen oqarpoq:
”Pilersaarutitut Periusissiaq 2020 aqqutigalugu ukiunut takkuttussanut pilersaarusiornermut anguniagalikkamik sammivissaq inissipparput. Anguniagaq tassaavoq uagut kommunitut akisussaassusilimmik iliuuseqarnissamut, aammalu pinngortitatta isumalluutittalu illersornissaannut akisussaassusitsinnik malinnaanissatta qularnaarnissaa. Taamaattumik periusissiaq piujuartitsinissamut tunngavigisanik aamma Naalagaaffiit Peqatigiit Nunarsuarmut anguniagaannik tunngaveqassasoq aalajangiussimavarput.”
Periusissiap inooqatigiinnermi, aningaasaqarnermi, kultureqarnermi, silap pissusaanut aamma avatangiisinut tunngasutigut suliassaqarfiit iluini Kommunalbestyrelsip anguniagai nassuiarpai. Naalagaaffiit Peqatigiit (FN-ip) piujuartitsisutut ineriartortitsinermut Nunarsuarmut anguniagai iliuuserisat sammivilersinnissaannut sakkussatut atorneqarput, aammalu kommunip suliarisaanut nunarsuarmut piffissamullu ungasissumut anguniakkanut ilalersuisuupput. Nunarsuarmi anguniakkat 2030-p tungaanut siunnerfeqarput, aammalu piffissap taassuma tungaanut nunarsuarmi anguniakkanik suliaqarnermini kommunip killiffigisani nalunaarsortuassavai. Aammattaaq 2021-2033-mut Avannaata Kommuniata Pilersaarutaanik iluarsaassinermut periusissiaq aallaaveqartitsivoq.
Periusissiamut, naalakkersuinermik ingerlataqartunik, atorfilinnik suleqatigisanillu oqaloqateqarluni suliarineqartumut ilanngussuinermik suliaq annertooq tunngaviuvoq. Kommunimissaaq innuttaasut immersugassamik misissuineq aqqutigalugu ilisimatinneqarlutillu ilanngussorneqarput.
Periusissiakkuttaaq Avannaata Kommunia nutaamik takorluugaqalerpoq; ”Peqataaffigisatut piujuartitsisutut ineriartortitsineq”. Siunissami ineriartortitsinissaq innuttaasut, inuussutissarsiorfiit, suleqatigisat piumassutsiminnillu suliaqartut peqatigalugit pilersaarusiornissaq pillugu Kommunalbestyrelsip kissaatigisaanik takorluugaq malunnaartitsivoq.
Nunat tamalaani soqutigisaqaqatigiit, nunanilu allani innuttaasut isumagalugit periusissiaq oqaatsit kalaallisut, danskisut tuluttullu atorlugit suliarineqartoq pissarsiassaavoq.
Planstrategi 2020
Ullormit 4. novembarimit ulloq 16. decembari 2020 tikillugu Pilersaarutitut Periusissiaq 2020 tusarniaassutaavoq. Periusissiamut tunngasutut apeqqutit Pilersaarusiornermut pisortamut Hanne Holm Andersenimut, hha@avannaata.gl-ikkut, imaluunniit AC-fuldmægtigimut Maria Blichfeldt Petersenimut mabp@avannaata.gl-ikkut saaffiginnissutaasinnaapput.