airplanebooksbriefcase business cogs cross election entertainment fish house law lockmedicalpeopleselfservices socialtax

Ilaqutareeqarnermi angalasartoqatigiit ukiumi nutaami annertusaavigineqalersoq

Avannaata Kommuniani Ilaqutareeqarnermut Ingerlatsivik qaffassaavigineqarluni angalasartoqatigiit maanna marlunnik inuttaqartoq sisamanik nutaanik atorfinitsitsinikkut nukittorsaavigineqassaaq, borgmesteri isumaqarpoq. Angalasartoqatigiit Avannaata Kommuniani isumaginninnikkut suliassatigut pisanngorsaassapput.
6. november 2020
Avannaata Kommuniani siunnersortit aamma suliassanik isumaginnittartut qaammatit tamaasa illoqarfinnut ataasiakkaanut angalallutik meeqqanut inuusuttunullu, innarluutilinnut aammalu Ilaqutareeqarnermut Ingerlatsivimmi suliassanik allanut tunngasunik isumaginnikkiartortarput. Angalasartoqatigiit ukioq missingersuusiorfiusoq 2021 aallarnerfigalugu sisamanik ilaneqarnissartik naatsorsuutigisinnaavaat, taamaasillunilu kommunimi susassaqarfimmi suliarinnittarnernikkut pitsanngorsaasoqarlunilu pitsaassutsikkut qaffassaasoqarsinnaalissaaq.

- Pingaartumik Qaanaami Upernavimmilu inunnik isumaginninnikkut siunnersortinik isumaginnittunillu atorfinitsitsiniarneq ajornakusoortorujussuusoq nassuerutigisariaqarparput, tassami arlaleriarluta atorfinnik inuttassarsiussiffigisarsimagaluarparput kinguneqanngitsumilli. Taamaammat angalasartoqatigiit ukioq missingersuusiorfiusoq nutaaq aallernerfigalugu ilasariaqalerpagut, taamaasilluta inatsisini piumasaqaataasunut malinnissinnaaniassagatta isumaginninnikkullu suliassanik pitsaanerusumik suliaqarluta, Avannaata Kommuniani borgmesteri Palle Jerimiassen oqarpoq.

Aqqutit nalinginnaasuunngitsut

Borgmesteri oqarpoq, angalasartoqatigiit maannamut inunnik isumaginninnikkut siunnersortinik marlunnik inuttaqartoq ukiumi missingersuusiorfiusumi nutaamiit sisamanik ilaneqassasut. Atorfinittussat inunnik isumaginninnikkut siunnersortitut allatulluunniit naapertuuttumik ilinniagaqartuusinnaapput.

Ilaqutareeqarnermut susassaqarfik ukiumut 260 millioner koruuninik missingersuuteqarfiusarpoq, angalasartoqatigiillu ilaneqarpata kommunimut ukiumut 2-3 millioner koruuninik aningaasartuutaanerussaaq.

- Ilulissat avataanni atorfiit inuttalersinnaanagit nassuerutigereerlugu isumaginninnikkut akisussaaffipput eqquutsinniarlugu aqqutit nalinginnaasuunngitsut atortariaqalerpagut, taamaasillutalu innuttaasuni sanngiinnerpaartatsinnik kiffartuussinerput, soorlu sumiginnaanerit, isumaginninnikkut nalunaaruteqartussaatitaanerit aammalu kinguaassiuutitigut innimiilliornerit tungaasigut aamma meeqqat illersuisoqarfiata MIO-p aammalu innarluutilinnut illersuisoqarfiup Tilioq-p uparuaavigisimasaani pitsanngorsaanissanut periarfissaqalerluta, borgmesteri Palle Jerimiassen oqarpoq.

Avannaata Kommuniani siusinnerusukkut teknikkeqarnermut, inuussutissarsiornermut aammalu aningaasaqarnermut susassaqarfinni ukkassilluni nukittorsaasoqareerpoq, maannalu tassa ilaqutareeqarnermut susassaqarfik tullinnguuppoq.

Allattoq: Káte Hansen, khan@avannaata.gl