IBA-isumaqatigiissutaanik taaneqartoq (Impact Benefit Agreement), imaluunniit suleqatigiinnissamik isumaqatigiissutip suliniummut tunngatillugu minnerpaamik piffimmit 50%-nik sulisoqarnissaa kommunip qulakkiissuaa, taakkunani 45%-t Avannaata Kommunianeersuussallutik.
Sanaartornerup nalaani suliffissat 270-t missaanniissapput aatsitassarsiorfillu ingerlanneqalerpat suliffissat 175-usallutik.
Tamakku saniatigut Dundas Titanium piiaanissamut atatillugu, piffimmit sulisoqarnissaq siunertaralugu ilinniartitaanermut aningaasaateqarfimmik pilersitsiniarpoq. Soorlu aamma Qaanaap eqqaani ineriartortitsinissamut iluaqutaasussamik ineriartortitsinissamut aningaasaateqarfimmik pilersitsiniartoq.
- Tassa qujanartumik suliffissanik arlalinnik pilersitsilerpugut, sualummik kommunip avannaatungaani, borgmester Palle Jerimiassen oqarpoq.
Isumaqatigiissut ukiut 30-t atuutissaaq kisianni sulineq aallartinnginnerani suliniummut piiaanissamut matusinissamullu akuersissut pineqaqqaassaaq. Pilersaarutit 2022-p naannginnerani akuersissutigineqassapput aamma piiaanissaq kingusinnerpaamik decembarip ulluisa 31-t 2025 aallartissaaq.Allattoq: Nikolaj Sander
Assiliisoq: Nikolaj Sander