airplanebooksbriefcase business cogs cross election entertainment fish house law lockmedicalpeopleselfservices socialtax

2021-mut missingersuutit sipaarniuteqarnikkut akuerineqarput

Avannaata Kommuniata 2021-mut missingersuusiaasa aappassaaneerneqarneranni naatsorsuutitigut 42,8 millioner koruuninik amigartoorfiuvoq aammalu aningaasat karsimiittuutit 16,8 millioner koruuninik inerneqarlutik. Akileraarutitigut qaffaasoqarani ingerlatsivinni sipaarniartoqarpoq.
16. december 2020
Naatsorsuutit ukiumoortut inernerat aamma aningaasat karsimiittuutissat missingersuutit aappassaaneerneqarneranni taamaasillutik pitsanngoriaateqarput, missingersuutimmi siullermeerneqarneranni naatsorsuutini ukiumut inernerusoq 75,9 millioner koruuninik amigaartooruteqarfiugaluarpoq aammalu karsimiittuutissat 38,6 millioner koruuninik amigartoorfiusimagaluarlutik. Taamaasineranilu ingerlatsiviit ukiumut naatsorsuutit 2019-imeersut aallaavigalugit sipaarniuteqaqqullugit qinnuigineqarput.

Akerlianik aningaasaqarnermut ataatsimiititaliap Ilinniartitaanermut Ingerlatsivimmi sipaarniuteqarnissamut inassuteqarnera akuerineqanngilaq, taamaasillunilu Peroriartortitsinermut Ataatsimiititaliap inassutaa 262 millioner koruuninik tunngaveqartoq ilalerneqarpoq.

Kommunalbestyrelsimi ilaasortat ingerlatsivinni sipaarniuteqaqqusinerat assigiinngitsunik tunngaveqarpoq. Ilaatigut ingerlatsivinni missingersuusiat ukiup siulianut naleqqiullugit qaffasinnerusimapput, Namminersorlutik Oqartussanit tapiissutit appartinneqarsimapput, ilaatigut akissarsianut aammalu akinut nalimmassaatit peerneqarsimallutik, Covid-19-ilu pissutigalugu kommunit tamarmik akileraarutitigut isertitassaminnik 2,5 %-inik appasinnerutitsinissaat inassutigineqarsimavoq kiisalu siusinaarluni soraarnerussutisiassat 2021-mi juulip aallaqqaataani kommuninit akisussaaffigineqalernissaat pissutigalugu kommunit sillimmaartaarfigisussanngorsimavaat.

Nunaqarfiit aningaasatigut qaffaavigineqarput
Ingerlatsivinni sipaarniartoqarnissaanik kommunalbestyrelsimi noqqaassutigineqartut saniasigut
kommunalbestyrelsip missingersuutinik aappassaaneerinninnginnerani isumasioqatigiissimanermi aalajangikkat aamma aningaasassaqartinnissaat isumagineqartussaavoq. Isumasioqatigiinnermi peqataapput kommunalbestyrelsimi ilaasortat, nunaqarfinni aqutsisut siulittaasui aammalu atorfilittat.

Isumasioqatigiinnermi peqataasut ilaatigut isumaqatigiissutigaat nunaqarfinnut ukiumoortumik aningaasaliissutaasartut 25.000 koruuniniit 50.000 koruuninut qaffanneqassasut. Qaffaasoqannginnerani kommune nunaqarfinni aqutsisunut ukiumut 275.000 koruuninik aningaasaliisarsimavoq, ukiortaamiillu nunaqarfinnut ukiumut 550.000 koruuninik aningaasaliisoqartalissaaq.

- Najukkani ataatsimiititaliat aamma nunaqarfinni ataatsimiititaliat annerusumik akisussaaffeqalerusullutik oqariartuuteqarsimanerat aallaavigalugu akisussaaffiisa annertusinissaannik tusarniaanissarput aallartissinnaanngorparput, uagullu kommunimi politikeritut sinaakkusiinissarput isumagissavarput, borgmesteri Palle Jerimiassen kommunalbestyrelsimi ataatsimiinnermi oqarpoq.
Isertitaqqortunerit ulluunerani paaqqinninnermut qaffaavigineqassapput
Ulluunerani paaqqinninnermut akit aamma qaffaavigineqassapput, tamatumanilu angajoqqaat isertitaqqortunerit akitigut qaffaaviginiarneqassapput. Aningaasatigut isertitat meeqqat immikkut pisariaqartitsisut meeqqerivinni atuarfinnilu ikorfartorteqartinneqarnissaannut atorneqassapput. Tamatumanilu Atassut aamma Partii Naleraq akerliupput.

- Akunnattumik isertitallit nammattuutittuarsinnaanngilagut. Pingaartumik isertitakinnerpaat akunnattumik isertitaqalernissamut ikaarsaariarnissaat nakernarunnaassaaq. Isertitakinnerpaat sutigut tamatigut tapeqartinneqarput, taamaammallu akinik qaffaanissaq isumaqatiginngilarput, Aqqalu Jerimiassen Atassut sinnerlugu kommunalbestyrelsimi ilaasortaq oqarpoq. Aqqaluk Heilmann Partii Naleraq-meersoq aamma akinik qaffaanissamut akerliuvoq.

Isertitaqqortunerni isertitat assigiinngitsut aallaavigalugit akitsuisoqarsinnaaneranik aningaasaqarnermut immikkoortortami maanna naatsorsuisoqarpoq. Tamatuma kingorna kommunalbestyrelsimi decembarip 21-ani immikkut ittumik ataatsimiittoqarnerani akissarsiaqqortunerni sorliit aallaavigalugit akinik qaffaasoqassanersoq aalajangiisoqarumaarpoq.

Ilulissat, Uummannap aamma Upernaviup eqqaani piniutaarsiutinik saliinermut 100.000 koruuninik ilassutitut aningaasaliisoqarnissaa aamma kommunalbestyrelsimi isumaqatigiissutigineqarpoq, taamalu tamatumunnga 300.000 koruunit atorneqartussanngorput.

Allattoq: Káte Hansen, khan@avannaata.gl