airplanebooksbriefcase business cogs cross election entertainment fish house law lockmedicalpeopleselfservices socialtax

Angerlarsimaffeqanngitsut unnuisarfissaat malittarisassaqalerpoq

Angerlarsimaffeqanngitsut Ilulissani unnuisarfittaassaat unnuisarfittuinnaq atorneqassanngilaq. Unnuisarfimmimi atuisut malittarisassartaavi nutaat kommunalbestyrelsimit akuerineqartut malillugit isumaginninnikkut sullissisumik oqaloqarnissamut periarfissaqalissapput, taamalu pitsaanerusumik inuuneqalernissaminnut ikiorneqarlutillu ikorfartorneqarsinnaassapput.
17. december 2020
Avannaata Kommuniani angerlarsimaffeqanngitsunut unnuisarfittaassap kommunimi kisiartaagallartup malittarisassai kommunalbestyrelsimit akuerineqaqqammerput. Taamaasilluni angerlarsimaffeqanngitsunut unnuisarfik 2020-mi decembarip 18-iani atulerpat angerlarsimaffeqanngisut pitsaanerusumik inuuneqalernissaannut kommunimit ikiorneqarsinnaanngussapput.

Avannaata Kommunia Kommuneqarfik Sermersuup angerlarsimaffeqanngitsunut unnuisarfiata malittarisassai isumassarsiorfigalugit kommunimut naleqqussaalluni malittarisassaliorsimavoq.

Ataasiakkaat iliuusissatut pilersaarusiuunneqassapput

Angerlarsimaffeqanngitsut unnuisarfimmik atuisuusut ilaatigut isumaginninnikkut sullissisumik oqaloqatiginnittarnissaminnut periarfissinneqassapput. Oqaloqatiginnittarnissap siunertaa pillugu ima allassimasoqarpoq:

- Innuttaasup sapinngisamik imminut ikiorsinnaalernissaanut aallarnisaataasumik ikorfartuinissaq, kaammattuinissaq isumassuinissarlu siunertaavoq. Malitsigisaanik ikiorneqarneratigut innuttaasoq namminerisaminik ineqalernissaanut siunertaqartumik ikiuinissaq ikorfartuinissarlu siunertaapput.

Angerlarsimaffeqanngitsut unnuisarfimmik atuisuusut iliuusissatut pilersaarusiuunneqarusuttut ilaatigut kommunimi isumaginninnikkut sullissisumik oqaloqateqassapput.

Angerlarsimaffeqanngitsunut unnuisarfik ullut tamakkiallugit unnuiffiusinnaavoq aammali ullut tamaasa nal. 9.00-imiit 11.00-ip tungaanut eqqiaanerup nalaani matoqqasassalluni. Unnuisarfimmi unnuiniaraanni isumaginninnermut ingerlatsivimmi oqaloqatiginnittartumut saaffiginnittoqassaaq.

Akeqanngitsumik ullaakkorsiortoqarsinnaallunilu unnukkorsiutitortoqarsinnaassaaq, taakkulu illoqarfimmi suliffeqarfinnit tunissutaasassapput.

Unnuisarfik 2020-mi novembarip 15-iani atorneqalertussaagaluarpoq, sanaartorneqarneratigulli kinguaattoortoqarmat ammarneqarnissaa kinguartinneqartariaqarsimavoq.

Allattoq: Káte Hansen, khan@avannaata.gl