Nalunaaqutaq qulinut peqqissaavimmi sulisut paaqqinnittullu toqqakkat kapitipput. Kingorna Sermermiut kulturhus kapitittarfilerlugu utaqqisarfittalerlugulu aaqqissuunneqarpoq, taamaalilluni innuttaasut siulliit nalunaaqutaq pingasunut kapiteqqaartussat aallarteriaannanngorlugit.
- Ullumi inuit 160-170-t kapinissaat naatsorsuutigaarput. Maanna 300-t miss. kapisussaavavut taamaattumik sisamanngorpat naammassinissarput naatsorsuutigaarput, Peter Vedsted, Avannaata immikkoortortaqarfiani nakorsaaneq oqarpoq.
Aallaqqaammut innuttaasut 75-imiit qummut ukiullit siulliunneqassapput taava innuttaasut sanngiinnerusut kapineqassapput. Peqqissaavimmit innuttaasut kapitinnissaannut aggersaasassapput taamaalilluni pisariaqanngitsumik inuit amerlasuut ataatsimut katersuutissanngillat.
Kommunip bussii nalinginnaasumik ingerlaarnerat atorunnaarallartinneqarpoq innuttaasut kapitittussat aaneqartaqattaarnerannut atorneqarallarmata.
Pingasunngorneq qulinut peqqissaavimmit sulisut illoqarfiliassapput, innuttaasut utoqqaat illuiniittut puigortunngortullu illuiniittut akiuussutissamik kapiartorlugit, taava sisamanngorneq Sermermiuni akiuussutissamik kapoorineq nanginneqassaaq.
Aallaqqaammut taamaallaat Ilulissani kapoorisoqarsinnaavoq akiuussutissamut kapuutissat passunneqarnissaannut toqqorsimanissaannullu piumasaqaatit immikkut ittut pillugit.
- Ajoraluartumik taamaallaat Ilulissani kapoorisinnaavugut piffimmi akiuussutissap akoortariaqarnera pissutigalugu. -80 gradimiittussaavoq, aassagaluarpallu aannerata kingorna nuttarsinnaajunnaassammat Peter Vedsted nassuiaavoq.
Nassiunneqartussat tulliuttut eqqarsaatigalugit ajornannginnerusumik passunneqarsinnaanissaat angallanneqarsinnaanissaallu anguniarlugu suliarinnittoqarpoq.
Maanna innuttaasut akiuussutissamik kapitittut sap. ak. pingasut qaangiuppata kapiteqqinnissamut aggersagaaqqissapput.
Allattoq: Nikolaj Sander
Assiliisoq: Nikolaj Sander