Nunaqarfinni ilagiit sinniisaannut qinigassanngortittut illoqarfinni ilagiit sinniisaannut qinigassanngortittunit marloriaat sinnerlugu amerlanerupput. Nunaqarfinni 39-t qinigassanngortipput illoqarfinnilu 18-it qinigassanngortillutik. Qinigassanngortittut allattorsimaffiat uani takuuk.
Ilagiit sinniisaannut qinigassanngortittut kommunalbestyrelsimut qinigassanngortittunut piumasaqaatit assingi naammaasisimagunikkit aammalu nunatsinni ilagiinni ilaagunik qinerneqarsinnaatitaapput.
2021-mi kommunimut aamma ilagiit sinnissaannut qinersineq pillugu ilitsersuut naapertorlugu ilagiit sinniisaannut qinigassanngortittut ataasiakkaarlutik taamaallaat qinigassanngortissinnaapput. Taamaammat qinigassanngortittut partiitut imaluunniit kattusseqatigiittut qinigassanngortissinnaanngillat.
Ilinniartut, napparsimmavinni uninngasut allallu sivikitsuinnarmik nunatta avataaniittariaqartut ilagiit sinniisaannut qinersinermi qinersisinnaapput.
Qinersisartut qinersisinnaanertik qulakkeerusukkunikku qinersisartut allattorsimaffiannik innuttaasunut sullissivinni alakkaasinnaapput ulluni ukunani:
Kommunalbestyrelse 15. aamma 16. marts 2021
Ilagiit sinniisaat 15. aamma 16. marts 2021
Nunaqarfinni aqutsisut 23. aamma 24. marts 2021
Inatsisartut 15. aamma 16. marts 2021
Coronamik tuniluuttoqaratarsinnaanera sillimaffiginiarlugu innuttaasut allakkatigut taasinissaat kaammattuutigineqarpoq. Taasivissat Naalakkersuisunit akuerisaasut atorneqassapput. Taasivissat allat atorneqarpata atorsinnaanngitsutut nalilerneqassapput.
Avannaata Kommuniani nunaqarfiit inoqarfiusut 21-upput illoqarfiillu sisamallutik. Nunatsinni naatsorsueqqissaartarfik naapertorlugu Avannaata Kommuniani innuttaasut ukioq manna 10.820-upput, taakkunannga illoqarfinni 7.833-ullutik nunaqarfinnilu 2.987-iullutik.
Allattoq: Káte Hansen, khan@avannaata.gl