airplanebooksbriefcase business cogs cross election entertainment fish house law lockmedicalpeopleselfservices socialtax

Qinersinermi inernerugallartut akuerineqarallartut

Avannaata Kommuniani kommunalbestyrelsimut qinersinermi taasinernik kisitsinerit Avannaata Kommuniata qinersinermut siulersuisuinit ullumikkut akuerineqarallarput. Taasinerit kommunip nittartagaatigut saqqummiunneqarlutik naammagittaalliortoqarnissaanut sapaatip akunnerani ataatsimi periarfissiisoqarpoq.
8. april 2021

- Qinersinermut siulersuisut qinersinermi taasinerit ullumikkut akuersaarallarpaat kommunillu nittartagaatigut saqqummiullugit innuttaasut naammagittaalliuteqarnissaannut sapaatip akunneranik ataatsimik periarfissiillutik. Naammagittaalliuteqartoqanngippat taasinerit pisortatigoortumik kommunimit akuerineqassapput, tamatumalu kingorna qinersinermi siulersuisut qinersinermik allattaavimmik suliaqassapput, assilineqarneranillu Qinersinermut Ataatsimiititaliamut nassiussillutik, taakkulu qinersinerup inernivianik suliaqarnissaq isumagissavaat, Palleq Jerimiassen qinersinermut inatsit naapertorlugu kommunalbestyrelsip nutaap maajip aallaqqaataani atuutilersussap tungaanut borgmesteriusussaq oqarpoq.

Kommunalbestyrelsimi ilaasortanngortut nutaat sinniisussallu allattorsimaffiat uani alakkaruk.

Qinigassanngortissimasut kikkulluunniit aammalu qinersivimmi qinersisartut kikkulluunniit qinersinerup inernera pillugu allakkatigut naammagittaalliuteqarsinnaatitaapput. Naammagittaalliuut tunngavilersugaq ullormi qinersiviusumiit kingusinnerpaamik ullut arfineq-marluk qaangiutsinnagit qinersivimmi qinersinermut aqutsisumut tunniunneqareersimassaaq.

Siumut-p kommunalbestyrelsimi ilaasortaatitai suli qulingiluaassapput, Inuit Ataqatigiit kommunalbestyrelsimi issiatitaat marluk ataatsimik ilaneqarput. Atassutip issiatitai pingasuniit marlunnut appariarput, Demokraatit maannakkutut ataatsimik issiatitaqaannassapput kiisalu Naleraq kommunalbestyrelsimi maannakkutuut marlunnik issiatitaqaannassaaq.

Borgmester Palle Jerimiassen 338-nit taaguunneqarluni qinerneqaqqittoq parteeqatiminit Minik Høegh-Dam-imit 406-init taaguunneqartumit anguneqarpoq.

Kiinnat nutaat amerlanerussuteqartut

Avannaata Kommuniani kommunalbestyrelsimi nutaami kiinnat nutaat amerlanerussuteqarput. Ilaasortat nutaat qulit ilaasortaalissapput, maannamut kommunalbestyrelsimi ilaasortat arfineq-marluk qinigaaqqipput aammalu maannamut kommunalbestyrelsimi ilaasortat arfinillit qinigaaqqinngitsoorlutik.

Kommunalbestyrelsimi ilaasortat qulit tassaapput Knud Kleemann, Atassut, Niels Davidsen aamma Jens Ole Nathanielsen, marluullutik Inuit Ataqatigiinneersut, Jens NapãtôK’, Naleraq kiisalu Margrethe Christensen, Minik Høegh-Dam, Jørgen Kruse, Inuutersuaq Løvstrøm, Elisabeth Nielsen aamma Ane Qujaukitsoq, tamarmik Siumut sinnerlugu qinigaasut.

Kommunalbestyrelsimi maannamut ilaasortaasut arfineq-marluusut kommunalbestyrelsimi ilaasortaaginnartut tassapput Aqqalu Clasen Jerimiassen, Atassut, Lena Ravn Davidsen, Demokraatit, Bendt B. Kristiansen, Inuit Ataqatigiit, Anthon Frederiksen, Naleraq kiisalu Sakio Fleischer, Palle Jerimiassen aamma Jakob Petersen, tamarmik Siumut sinnerlugu qinigaasut.

Kommunalbestyrelsimi maannamut ilaasortaasut arfinillit kommunalbestyrelsimi issiaannarnissamut naammattunik taaguunneqanngitsut tassaapput Karl Markussen, Atassut, Ane Marie Møller Andersen, Siumut, Jens Kristian Therkildsen, Siumut, Regine Bidstrup, Inuit Ataqatigiit kiisalu Aqqaluk Heilmann aamma Ole Danielsen, marluullutik Naleraq sinnerlugu qinigaasut.

Naak Jens Kristian Therkildsen, Siumut, 104-nit taaguunneqarluni parteeqatiminit Ane Qujaukitsoq-mit 95-init taaguunneqartumit amerlanernit taaguunneqaraluarluni kingulleq qinersivigisamini Qaanaami ilaasortatut kommunalbestyrelsimi ilaasortaalerpoq.

Qinigaaffimmi kingullermi kommunalbestyrelsimi ilaasortaasut sisamat qinigassanngorteqqinngitsut tassaapput Ane Lone Bagger, Jørgen Kristensen, Jens Danielsen kiisalu Susanne K. Eliassen tamarmik Siumut sinnerlugu qinigaasut.

Allattorsimaffimmi ataaniittumi kommunalbestyrelsimi nutaami ilaasortat aamma qassinit taaguunneqarsimaneri takuneqarsinnaapput.

Allattoq: Káte Hansen, khan@avannaata.gl

Allattorsimaffik: Valg.gl