airplanebooksbriefcase business cogs cross election entertainment fish house law lockmedicalpeopleselfservices socialtax

Sannaviusimasumik pisinikkut Qaanaami qatserisarfeqalissaaq


Kommunip Qaanaami sannaviusimasumik pisineratigut illoqarfimmi qatserisarfeqalernissaa ilimagisamit sukkanerusumik piviusunngortinneqarsinnaanngorpoq. Nutaamik qatserisarfiliornissaagaluamut atortussat taamaasillutik nunaqarfinni pisariaqartitanut allanut atorneqarsinnaanngussapput.
13. april 2021
Sannaviusimasoq 900.000koruuneqartoq nutarsarlugulu allanngortiterlugu qatserisarfinngortinneqassaaq.
Qaanaami sannaviusimasumik nutarteriarlugu illoqarfimmi qatserisarfittut atorneqarsinnaasussamik pisineq Avannaata Kommuniani kommunalbestyrelsimi immikkut ittumik marsip 26-ani ataatsimiinnermi akuerineqarpoq. Kommunip sannaviusimasoq 900.000 koruunilerlugu pisiaraa.

2 millioner koruunit immikkoortinneqaqqaarsimagaluarput

Illuutigisaq maannakkut qatserisarfittut atorneqartoq mikivillaarlunilu aserfallassimallunilu ussiimmat 2021-mut aningaasaliinikkut kommune nutaamik qatserisarfittaarnissamut 2 millioner koruuninik immikkoortitseqqaarsimagaluarpoq.

Kommunimili naliliisoqarpoq, Qaanaami nutaamik sanaartornissaq pisariullunilu akisuallaassasoq. Kommunimiillu ilanngullugu nassuerutigineqarpoq, nutaarluinnarmik qatserisarfiliornissaq ukioq manna pisinnaanngitsoq aammalu aningaasaliissutit iluanni piviusunngortinneqarsinnaanngitsoq.

Taamaammat sannaviusimasumik pisinissamut neqerooruteqartoqarnera soqutigineqarluarpoq. Sannaviusimasumik pisinissaq tulluartuusorineqarpoq, illumimmi pineqartumik pisinikkut qatserisartoqarfeqarneq pilertortumik malunnaatilimmillu pitsanngoriartinneqarsinnaasorineqarpoq.

Sannaviusimasoq 330 kvadratmeterisut angitigisoq sannaviuvoq, biilinik inissiisarfilik, quilik aammalu sisamanik sinittarfilik. Pisinermi ilaapput uuliamik ikummatissaasivik, imiisivik atortullu assigiinngitsut aammalu maskiinat sannatillu nutarsaanermi aammalumi Qaanaami tamarmi atorluarneqarsinnaasut.

Sannavimmik pisereernerup kingorna qatserisarfittaassap nutarterneqarnissaanut allanngortiternissaanullu aningaasanik sinneqartoqangaatsiassaaq. Tamatumalu saniatigut nutaamik qatserisarfiliornissamut atortussat maanna Qaanaamiittut nunaqarfinni pisariaqartinneqartunut, soorlu umiatsianik aaqqissuisarfinnut atorneqarsinnaassapput.

Arajutsisaqannginnissaq qulakkeerniarlugu qatserisarfinngortussamut saniliusoq qaninneq tusarniaavigineqassaaq.

Allattoq: Káte Hansen, khan@avannaata.gl
Asseq: Panigpak Daorana