Isaterinikkut Qaanaami inuusuttunut inissialiortoqarsinnaalerpoq

Illu B-241-p siornatigut inuusuttunut inissiaasimasup Namminersorlutik Oqartussanut tunniunneqarnissaanik inassuteqaat Avannaata Kommuniata kommunalbestyrelsiani immikkut ittummik marsip 26-ani ataatsimiinnermi akuersaarneqarpoq, piginnittuulersullu illu isateriarlugu toqqaviani inuusuttunut inissianik arfinilinnik sanaartortitsiniarput.

Inuusuttunut inissialiat siullermik umiarsuaqarneratigut sanaartorlugit aallartinneqarsinnaassapput 2022-milu oktobarip naanerani iserterfigineqarsinnaassallutik. Inuusuttunut inissiliassat uiguleriiaatut arfinilittut immikkoortutut sananeqartussat immikkut uffarfeqarlutillu perusuertarfeqarlutillu igaffeqassapput.

Illoqarfiiup ilaa takujuminarnerulissaaq
Qaanaami nunap qeriuaannartuunera akimmiffissaqartitsisorujussuuvoq, illuli 1985-imili tassaniissimammat kommunimit naliliisoqarpoq, inissisimaffia toqqavissatsialaasoq. Tamatuma saniatigut B-241-p isaterneqarneratigut illut inoqanngittuarsinnartut pinngitsoorneqarsinnaapput, nutaamillu illuliortoqarneratigut illoqarfiup ilaa tamanna takujuminarnerulissaaq.

Illup isaterneqarnissaanik toqqavigisimasaanilu inuusuttunut inissiassanik sananissaq Namminersorlutik Oqartussaneersut kommunimut namminneq saaffiginnissutigisimavaat.

Illu kommunimit pigineqartoq aserfallassimaqaaq. Illulu atorneqaqqissinnaassappat nutarterluinnartariaqarpoq imaluunniit nutaamik sanasoqartariaqarluni. Illulu tunniunneqarpat illumik nutarterisinnaanermut isaterisinnaanermullu kommunimut aningaasartuutaaratarsinnaasut pinngitsoortinneqassapput.

Illup isaterneqarnera Namminersorlutik Oqartussanit aningaasartuutigineqassaaq, taamaakkaluartorli toqqavigisimasaani innaallagissamut imermullu atassuteqareernera aammalu toqqavissaq sanaartorfigineqarsinnaasoq pissarsiarineqassapput.

Illu kommunimit siorna tuniniarneqarsimagaluarpoq, soqutiginnittoqarsimanngilarli.

Allattoq: Káte Hansen, khan@avannaata.gl
Assiliisoq: Panigpak Daorana