Innuttaasut oqaluttuaraat namminneq silaannaap allanngutaanik qanoq misiginerminnik aammalu Upernavimmi eqqaanilu avatangiisinut mingutitsilluni ajornartorsiorneq. Ukiut kingullit 10-30-t misigisimavaat immap sikusarnera annikilliartortoq aammalu siku qanoq qajannartigisartoq. Anorersuit sakkortunerulersimapput silaannarlu isugutanerulersimalluni. Aamma misigisimavaat niviukkernerulersoq kiisalu timmissat naa-sullu nutaat takussaaneruleriartorlutik.
”Misigalugu nuanneqaaq takkuttut taama tunniusimatigimmata aammalu piujuaannartitsinermut oqallisis-sianut tiguartilluaqqammata. Kissaataasutut misigisimaqaara avatangiisinut pissutsinut pitsanngorsaarusus-suseq ataatsimoortumillu pinngortitarsuatta paarilluarnerunissaa” taama oqarpoq suliniummut aqutsisoq Piujuaannartitsinermut immikkoortoqarfimmeersoq Maria Blichtfeldt Petersen.
Innuttaasut isumassarsiarpassuarnik peqarput. Ilaatigut kissaatigaat qaammarsaaniarnissaq aammalu atuartitaanermi meeqqat piujuaannartitsinermut tunngasunik atuartitaanerunissaat, eqqagassalerineq pitsaanerusoq aammalu avatangiisinut innarliinnginnerusunik ulluinnarsiutinik nioqqutissatigut periarfissaqartitaa-nerunissaq. Annermik FN-p nunarsuarmioqatigiinnut siunniussai imeq eqqiluisaarnerunerlu, ilinniartitaaneq, imaani uumassusillit, eqqagassalerineq aammalu nerisatigut pilersuineq, innuttaasunit pingaartitaanerusut.
”Kommunitsinni annertuumik suliassaqarpugut tassuunalu piumasaqaataavoq pitsaasumik suleqatigiinnissaq innuttaasut, peqatigiiffiit aamma suliffeqarfiit akornanni. Taamaattumik qanittumi aamma sumiiffinni suliffeqarfinnik ataatsimeeqateqartassaagut” taama Maria oqarpoq.
Kommunip piujuaannartitsinermut immikkoortoqarfia ugguuna attavigineqarsinnaavoq mabp@avannata.gl imaluunniit ugguuna piujuaa@avannaata.gl
Allattoq: Maria Blichfeldt Petersen
