Qujanaq.
Kommunalbestyrelsimut qiningaasut ilaquttasilu tamassi pilluaritsi.
Avannaata kommuniani kommunalbestyrelsimut isernissinni suliassaaleqinavianngilasi. Kommuni isorartoorujussuaq atukkatingullu assingiinngitsorujussuaq suliassarpassuaqarpoq. Uanguuvorlu suliassamut kivitsiniartussat innuttaasut sumiikkaluarunilluunniit pitsaasumik atungaqarnissaat qulakkeerniarlugu.
Kommuni ataasiuvoq, kommunilu ataasiusoq ataatsimoortorlu suleqatigiiffingalugu sulinissamut tamassi ilaseraassi aamma tamanna anersaaralungu sulinerput ingerlatissuarput.
Piffissaq sivittuleraluarpoq ivertinneqarnissarput utaqqillutingu, taassuma aamma takutippaa kommunerput qanoq isorartutiginersoq. Ilimanamiit Siorapalummut kilumiitererpassuupput aamma atukkat assingiinngitsorujussuupput. Piffiit tamarmik piorsarneqarnisaminnik pisariaqartitsipput, pisariqartitsinerlu taama annertutigisoq kommunitut kisitta kivissinnaanngilarput taamaattumik Naalakkersuinikkut ingerlatsisut aamma qanimut suleqatigissuagut ataatsimoorluta inerisaanissaq ingerlatissangatsigu. Naalakkersuisut illuatungilersornagit suleqatissatut isingalugit oqaloqatingiinnerit ingerlattassavagut.
Tamat oqartussaaqataanerat peqataatitsinermik tunngaveqassaaq, innuttaasutut isummersoqataaginnaratik ilusilersueqataatinneqassapput. Sumiiffimmi ataatsimiititaliat ilusilersugaanerat isorliunerusuni nutarterneqassaaq, sinniiseqassuseq tamat toqqissisimaffiginerusinnaasaat toqqammavigalugu.
Kommunitta iluani aningaasarpassuit pilersinneqartartut kommunitsinnut iluaqutaanerusumik tuttalernissaat anguniassuarput atukkat innuttaasunut pitsanngorsarniarlugit.
Nunaqarfinnut isorliunerusunullu periusissamik suliaqassuugut ukiunut qulinut tulliuttunut atungasamik, ukiut ataasiakkaarlugit aningaasaliimineqattaartarnerit qimallugit periusissiami siunnerfiit malillugit ingerlatsilernissaq anguniarlungu.
Aqquserngit, eqqaaveqarfiit, anartarfiit, ineqarneq, najungaqariaatsit allallumi unammilligassat aningaasaqartissagutsigit inuussutissarsiuteqartut pitsaasumik siunnerfilertariaqarpagut tamannalu aamma aaqqiiviginiarlungu iliuusissanik suliaqassuugut.
Kommunitsinni ukiuni qulikkaani tulliuttuni avatangiisitsinnik atuinerput malunnaatilimmik siuarsaavigissavarput. Eqqakkat katersorneqartarnerat illoqarfinni nunaqarfinnilu siuarsaaffigiumallugit annertusisamik iliuuseqassaagut.
Tuaviornarsivormi massakkut, mittarfissaq Ilulissani aanaralaanngorpoq, pilersaarutit piffinnut tamanut atuuttussat suliarineqassapput mittarfiup tallinera kommunitsinnut tamarmut iluaqutaanissaa qulakkeerniarlungu.
Illoqarfinni tamani inuussutissarsiuteqarnikkut inerisaanissaq siunertaralungu siunnersortinik piffinni tamani pilersitsinissaq siunnissatta ilangivaat uanilu qinigaaffimmi naammassineqarnissaa anguniarparput.
Ukiut aggersut takornariaqarnikkut annertuumik pisoqarfiussasut qularnanngilaq. Nunaqavissut takornarissanik sullissinermik annerusumik peqataatinneqarnissaat aqqutissiuunneqassaaq, pikkorissaanerit periarfissanillu ilusilersuinerit aqqutigalugit, tamanna suliffeqarfiit peqatigilluinnarlugit aaqqissuunneqassaaq.
Meerartatta atugaat suli annertunerujussuarmik pingaarnerpaatullu samminissaanut siunnerfeqatigiinnerput ugguuna erseqqisarusuppara.
Meeqqap kissaatiginerpaasarpaa anaanap ataatallu najornissaa, taamaattumik angerlarsimaffiup avataanut inissiinnginnermi suliniutit angajoqqaanik peqataatitsinermik tunngavillit aallunneqassapput. Ilaqutariinnik ataatsimut sullissineq pikkorissarnernik pisariaqartunik toqqammavilik, meeqqat inuusuttullu
angerlarsimaffimminnut angerlariartortinneqarnissaannik siunertalik.
Immikkut pingaartillugu taasariaqarpoq, meeqqat immikkut pisariaqartitsisut siusittukkut iliuuseqarfigineqartarnerat annertusisamik periuseqarfigissallutigu.
Ilaqutariittut ajornartorsiutit inissaaleqinerlu ataqatigiikkajuttarput. Inoqarfiit ineriartortut inissaqarniarnikkut inerisaavigineqassapput, inuusuttunut inissialiorneq pingaartutut anguniarneqassaaq, pingaartumik inuusuttut meerartallit annerusumik periarfissaqartinneqassapput. Suliffeqarfiit ineriartornermut annertuumik peqataasut inissialiornikkut akisussaaqataanerussapput.
Kultuuri timersornerlu pitsaaliuinerupput annertuumik, taamaattumik malunnaatilimmik inerisaavigineqassapput, ilaatigut kulturikkut timersornermillu siunnersortimik atorfinitsitsinikkut.
Innuttaasut isumassuinermi – pingaartumik meeqqat inuusuttullu - sullinneqarnerat ataatsimut isigalugu nukiit pitsaanerusumik siammasinnerusumillu atornissaat anguniarlugu isumassuinermi sullissinitta nutaamik aaqqissuuteqqinneqarnissaa sulissutigissuarput – sullissineq meeqqap angajoqqaavisalu alloriaqatigiiffigisinnaasaanik tunngavilik.
Inuusuttut tamaasa atorfissaqartippagut, taamaattumik alloriarnissaminnut suli iliuuseqarsimanngitsut nassaarisariaqarpagut aqqutissiuullugillu, inuiattut pisariaqartilluinnarpagut inuusuttagut.
Sunngiffik peqqinnerulernissarlu anguniarlungu suliniutit suli annertunerusumik eqqumaffigineqassapput innuttaasut sammissassaqartinnissaat annertusarniarlungu aamma innuttaasut peqqinnarnerusumik inuuneqalernissaat anguniarlungu.
Aalisarneq ingerlalluarangaat kommunerput ingerlalluartarpoq taamaattumik aalisarnikkut atukkat suli pimoorullugit pitsanngorsarnissaannut kattuffiit peqatigiiffiillu tamaasa suleqatiseraangut. Ataatsimoorluta ingerlaqatigiikkutta angusassarput angineruvoq. Aalisartut atortuminnik aserfallattaaliiffigisinnaasaannik periarfissat inerisarneqassapput - ilaatigut qamusiorfiit, umiatsialeriviit neqitsersuiviusinnaasullu inerisaanikkut.
Aalisarnermut inatsisissap suliarineqarnerani Avannaata Kommunia aalisartut peqatigiiffii qanimut peqatigalugit isummersoqataassooq.
Aalisarnermi piniarnermilu atukkat sumiiffikkaartumik pisariaqaritsineq naapertorlugu ileqqoreqqusarliornikkut tulluussaavigineqassapput.
Qaleralinniarnermi ileqqoreqqusat nalilersoqqinneqassapput, pingaartumik Diskobugt-imi ileqqoreqqusaq, Uummannallu sulluani ileqqoreqqusaq inaarsarneqarluni.
Aalisarnermi siunnersuisooqatigiit pilersinneqassapput.
Aalisarfinni saliisitsisarnermut aningaasaliisarneq ingerlaannassooq
Tunisassiorfiit kommunitsinniittut qanimut suleqatingalugit aalisarnerup suli pitsaanerusumik aningaasarsiutiginissaa suleqatigiissutigissutigissuarput.
Atuarfeqarneq meeqqeriveqarnerullu tungaatigut suli annertuumik suliassaqarpugut. Atuarfiit pitsanngorsagassat suli amerlapput aamma meeqqeriveqarnikkut kinguaattooqqanerput suliassaavoq annertooq. Pilersaarusiorluarnikkut pisariaqartitsinerilllu sumiinnersut qulaajarnerisigut suliassat tulleriiaarnissaat pilersaarusiorneqassaaq.
Kommunitsini isorartoqisumi internet pitsaasoq pinngitsoorsinnaaunnaarnikuuarput aamma pitsanngorsaanerit atorluarlugit alimasissumik atuartitsinerit inerisassuagut. 7.-10. Klasse-mi assassorissanut piginnaasallit piginnaasaminnik annertusaanissaminnut aqqutissiuunneqassapput atuangarsorneq assassornermik ikorfartorneqartumik.
Utoqqaat atungaat suli eqqumaffingalugit sulinerput ingerlateqqissuarput, ulluinnarnilu utoqqaat aningaasaqarnikkut pitsaanerusumik atungaqalernissaat anguniarlungu suliniutinik suliaqassuugut utoqqaat kaasarfimmiussaat annertusarusullugit. Utoqqaat illui aamma utoqqaat sapinnginnerusut najungaqarfissaannik kinguaattooqqanerput iliuuseqarfiginiarlungu pilersaarusiortoqassaaq pisariaqartitsinerup annertussusaa ersarissarniarlungu.
Kommuni innuttaasunut tamanut inuuffigiuminartoq najungaqarfigissallugulu pilerinartoq pilersikkusupparput taamaattumik innuttaasut tamaasa ilaseraangut kommunitta nuannersuunissaanut suleqataaqqullugit. Taamaasiorutta aatsaat kommuni innuttaasunut qanilaartoq sullissilluartorlu pilersissinnaangatsingu.
Suleqatigiilluta kommunerput ingerlatsingu taamaasiorutta angusassarput annepaaq angusinnaavarput.
Qujanaq