KNR-ip inuiattut ullorsiornermi Nuummi sissiukkaniit toqqaannartumik aallakaatitsisarnera ukioq manna allanngortinneqarluni Ilulissani pisut toqqaannartumik aallakaatinneqassapput.
Ilulissani inuiattut ullorsiornermi ullaakkut pisussat Zionip Oqaluffiata eqqaani erfalasumik amusinermik aallarnerneqassapput.
Nutaaliornitsialak
- KNR-ip inuiattut ullorsiornermi Nuummit toqqaannartumik aallakaatitsisarneranik ileqquusumik allanngortitsineq nutaaliornitsialaavoq. Taamaasilluni isiginnaartartut sinerissami pisartunik paasisaqarnerulissapput, Avannaata Kommuniani borgmesteri Palle Jerimiassen oqarpoq nangillunilu:
- KNR TV-p inuiattut ullorsiornissatsinni Ilulissanit aallakaatitsinissaa tunngavigalugu ullaakkut pisussat Zionip Oqaluffiata eqqaani pisussanngorlugit allannguivugut, taamalu Ilulissani allaffeqarfissuup eqqaani katersuuffigisaraluakkatsinnit kusanarnerujussuarnik avatangiiseqassaagut. Taamaammallu innuttaasut peqatigiiffillu inuiattut ullorsiornitsinni Zionip Oqaluffiata eqqaanut ullaakkut ornigutissapput.
Inuiattut ullorsionermi pisut KNR TV-kkut toqqaannartumik aallakaatinneqarnissaanni aqutsisussat marluusussat aappaa Nathan Kreutzmann ilisimatitsivoq, KNR-i aamma Ilulissani ullup ingerlanerani pisussanik toqqaannartumik aallakaatitsillunilu ilanngutassiisarumaartoq, unnullu naggaserlugu unnuisarfittaamit Hotel Ilulissanit toqqaannartumik allakaatitsinermi isiginnaartartut sinerissami pisunik takusaqarsinnaajumaartut.
Tusagassiortut atortulersaarutilerisullu KNR-imeersut Ilulissanut juunip 15-iani tikipput, taamalu coronamik tuniluuttoqaratarsinnaanera pissutigalugu Nuup mattunneqarnera sioqqutitsiarlugu Ilulissanut tikinnissaminnut angumerseqqatarput.
Inuiattut ullorsiornermi Ilulissani pisussat uani alakkerneqarsinnaapput.
Allattoq: Káte Hansen, khan@avannaata.gl