Silami ikuallaanissamut immikkut akuersissuteqareernermi eqqakkat ikiliartortut

Avannaata Kommuniani Ilulissat minillugu illoqarfinni nunaqarfinnilu tamani eqqaaveqarfinni immikkut akuerineqartumik silami ikuallaasinnaalernissamut kommune ukioq manna februaarip 23-ani qinnuteqarpoq. Immikkut akuersissuteqarneq qaammatini pingasuni atuuttussaq 2021-mi juunip 18-iani atuutilersinneqarpoq.

- Qaammatit pingasut taakku sapinngisamik atorluarniassavagut. Immikkut akuersissuteqartoqareersorlu eqqakkat naafferakkaanik ikuallattaratsigit ikiliartulertorput. Eqqaavissuaq ulikkaavikkaluarami, allaat eqqagassat inissaarukkaluarlutik, atorfilittaq Nicky Kristiansen, eqqagassalerinermi ingerlatsisumut aasaanerani sulinngiffeqartumut paarlattaasoq oqarpoq.

Malinnaasinnaanngillat
Avannaata Kommuniani inoqarfinni amerlanerni eqqakkanut ikuallaaveqaraluartoq sumiiffinni amerlanerni eqqaaveqarfiit ulikkaartoortarnerat ajornartorsiutaakkajuppoq.

- Upernavimmi ikuallaaveqaraluarpugut, anorili illoqarfiup tungaanut sammigaangat ikuallaavimmi imaluunniit containerini ammasuni eqqakkanik ikuallaasinnaasannginnatta eqqakkanut malinnaasinnaanngilagut. Nunaqarfinni ikuallaaviit amerlanerit ajoquteqarlutik atorsinnaanngimmata silami ikuallaasariaqartarput, taamaammat silami ikuallaanissamut immikkut akuersissuteqarneq eqqakkat ikilisarnissaannut atorluarniassavarput, Nicky Kristiansen oqarpoq.

Avannaata Kommuniata kommunit eqqagassalereqatigiiffiannit ESANI-mit ilaajunnaarnerata kingorna kommune najukkani eqqagassalerinermik aaqqiissutissarsiulerpoq.

- Ikuallaavinnik mikinernik atoqqiisinnaanermillu periarfissanik ilaatigut ujartuinertaqarpoq. Avannaata Kommunianilu tamarmi atuuttumik aaqqiissutissarsisoqareerpat aatsaat kommune silami ikuallaasarnissamut immikkut akuersissuteqartarnissamik pisariaqartitsissaaq, Karl Madsen Teknikkeqarnermut Ingerlatsivimmi pisortaq nassuiaavoq.

Allattoq: Káte Hansen, khan@avannaata.gl
Assit: Avannaata Kommunia