Upernavimmi ivigaasanik arsaattarfissaq naammassiartuaarneqartoq

Upernavimmi ivigaasanik arsaattarfiliap nunagissarneqarnera naammassiartuaarneqarpoq, arsaattarfillu ukioq manna aggustip qaammataani naammassineqassaaq.

Arsaattarfissaq Kalaallit Arsaattartut Kattuffiata pissartanngorniunnerni uammiuaarnernilu inunnit aqqanilinnit arsaaffigineqarsinnaasutut piumasaqaataanut naapertuuppoq. Ivigaasanik pilersuisut sapaatit akunneri marlussuit qaangiuppata Upernavimmut tikissapput, arsaattarfimmilu ivigaasalersuissallutik juulip 27-aniit aggustip 12-ata tungaanut illoqarfimmiissapput.

WGS Wellness Group A/S-imeersut ivigaasanik pilersuisuusut ivigaasalersuiartunnginneranni Upernavimmi suliassanik tamakkiisunik suliaqartartut LASØ A/S-meersut arsaattarfissaq piareersaleruttorpaat. Ilaatigut imeq arsaattarfimmit qaarajulaartumit maannamut ujaqqersorsimasumit kuussinnaaniassammat maleruagassat malillugit sioralersorneqassaaq. Tamatuma saniatigut sialuk upernaakkullu aattulernerani imeq kuussinnaaqqullugu arsaattarfik kaajallallugu kussiorneqassaaq.

Ivigaasanik arsaattarfiliornermi Inuplan A/S-imeersut siunnersuisuuppput. Arsaattarfiliassatut siunnersuut siulleq anginerusimagaluarpoq, ungataanili qaqqaq qaartitigassaq annertummat akitsorsaataassallunilu nutaamik pilersaarusiorneqartariaqarsimavoq.

Arsaattarfissaq 90 x 45 meeterinik angissuseqartoq Upernavimmi arsaattarfiusimasup inigisimasaani umiarsualiviup timersortarfiullu akornanniittumi inissisimavoq.

Ivigaasanik arsaattarfiliamik atoqqaartitsinissaq Avannaata Kommunianit kingusinnerusukkut nalunaarutigineqarumaarpoq.