airplanebooksbriefcase business cogs cross election entertainment fish house law lockmedicalpeopleselfservices socialtax

Ulluunerani paaqqinnittarfinni inissat illoqarfinni marlunni ikilisarneqartut

Ilulissani meeraaqqerivimmi inini silaannalunneq aamma Qaanaami meeqqerivimmi sulisussaaleqineq inilu ulloq naallugu najussallugu naleqqutinngitsoq illoqarfinni taakkunani marlunni ulluunerani paaqqinnittarfinni inissat appartinneqarnerannut peqqutaapput.
13. juli 2021
Ilulissani meeraaqqerivimmi inissanik arfinilinnik appaaneq aammalu Qaanaami meeqqerivimmi inissanik qulinik appaaneq illoqarfinni taakkunani utaqqisunik allattorsimaffimmut sunniuteqangaassanngillat. Taamaammat ulluunerani paaqqinnittarfinni taakkunani inissanik appaanissamik inassuteqaat kommunalbestyrelsimi juunip 23-ani ileqquusumik ataatsimiinnermi akuersissutigineqarpoq.

Ilulissani inissat siulliit arfinillit inueruppata allanik inissiisoqassanngilaq, Qaanaamilu meeqqat qulit atualersussaammata atuareernerup kingorna orniguttarfimmi paarineqartalissapput.

Silaannakilliorneq inilu naleqqutinngitsoq

Ilulissani meeraaqqerivimmi Mikisoq-mi init pingasuusut tamarmik immikkut meeqqanit aqqaneq-marlunnit inersimasunillu pingasunit najorneqartartut silaannarissiniassammata aammalu sulisut aqqaneq-marluusut sulinermikkut atugaat pitsaanerulerniassammata meeraaqqerivimmiittartut ikilisinniarneqarput.

Naak silaannarissarfiit ikumatinneqartuaraluartut inini CO2 qaffasippallaalertarpoq. Inini silaannakilliornermik peqquteqartumik atuisut anersaartorniarnikkut ajornartorsiuteqartarput aammalu amerluttoqartarluni. Ajornartorsiutillu taakku peqqutigerpiarlugit meeqqerisunngornianik immikkullu ikorfartortinngornianik meeqqerivimmi ilinniartoqarsinnaanngilaq.

Meeraaqqerivik Mikisoq Ilulissani blokkini pisoqaanerpaat ilaanni blokkini qaqortuni taaneqartartuni 1976-imilu sananeqarsimasuni inissisimavoq. Meeraaqqerivimmi inissat 36-niit 30-nut apparneqassapput.

Qaanaami meeqqerivimmi Ajaajaqarfik-mi sulisussaaleqineq aammalu init ilaat ulloq naallugu najussallugu naleqqutinngimmat inissat qulinik ikilisinneqassapput.

Meeqqerivik inissanut 32-nut naatsorsuussaagaluarpoq, 2016-imili inissitassatut utaqqisut ikilisarniarlugit inissat qulinik ilaneqarsimapput.

Inip ataatsip meeqqanit qulinit ulloq naallugu najorneqarnissaanut naleqqutinnginnera inissanik appaanermut peqqutaanerpaavoq. Ini pineqartoq sinittarfittut aallaqqaammut naatsorsuussaasimagaluarpoq, igalaavi qullasippallaarput aammalu perusuersartarfimmut asattarfimmullu attuumassuteqartinnerarani. Ini taanna sammisassaqarfittut naatsorsuussaanngitsoq aamma nipiliorfiuallaartarpoq.

Maannalu meeqqerivik taanna sulisussaaleqiffiuvoq aammalu iggavimmi ikiortimut meeqqat 42-t kisermaassilluni nerisitarissallugit artornartarluni.

Ane Qujaukitsoq-p, Siumut, Qaanaami najugaqartuusup kommunalbestyrelsimi ataatsimiinnermi kissaatigaa Qaanaami angerlarsimaffimmi meeqqerisinnaaneq misissuivigineqassasoq. Tamannalu imaqarniliornermi ilanngunneqarpoq.

Maanna Qaanaami meeraaqqerivinni inissinneqarnissamut utaqqisut aqqaniliupput aammalu meeqqerivinni inissinneqarnissamut utaqqisut arfineq-pingasuullutik.

Ilulissani meeraaqqervinni inissinneqarnissamut utaqqisut 55-iupput aammalu meeqqerivinni inissinneqarnissamut utaqqisut 22-ullutik.

Allattoq: Káte Hansen, khan@avannaata.gl