airplanebooksbriefcase business cogs cross election entertainment fish house law lockmedicalpeopleselfservices socialtax

Nutaaliortitsinermik siammartereqatigiinnissamik Ilulissani atsioqatigiinneq

Ilinniarfinni nutaaliorluni pilersitsiniarnissap ilinniartitsissutigineqarnissaa pillugu suleqatigiinnissaq Ilulissani Atuarfik Jørgen Brønlundimi ullumi tallimanngornermi septembarip 17-iani atsioqatigiissutigineqarpoq. USAID-imeersut aamma aningaasaateqarfimmeersut Fonden for Entreprenørskab Kalaallit Nunaat atsioqatigiissuteqarnerat meeqqat saaffigalugit ingerlanneqarpoq.
17. september 2021

Aningaasaateqarfiup siulittaasuata Jacob Nitter Sørensenip aamma USAID-imi allaffissornermi pisortap Margaret Ellisip atsioqatigiinneranni atuartut ikinngitsut najuuttuupput.

- Atuarfissinni kusanartumi ullumikkut najuunnera nuannaarutigaara. Suleqatigiinnissamik atsioqatigiinneq pingaaruteqarluinnartoq atsioqatigissutigeqqammerparput. Atuarfissi ittut Kalaallit Nunaanniittut sullittussaavagut. 1. imaluunniit 9. klassemi atuartuugussi suliniutinik pilersorneqarnissarsi siunertaavoq, taamaasillusi eqqarsarsinnaanissi ineriartortinneqarneratigut nutaaliorsinnaalissaasi immaqalu nammineq suliffiutitaarsinnaalissallusi, Margaret Ellis nassuiaavoq.

USAID 2,8 milliorner koruuninik tunisivoq
Isumaqatigiissut naapertorlugu aningaasaateqarfik Fonden for Entreprenørskab Kalaallit Nunaat amerikamiut tapiissuteqartarfiannit USAID-imit ukiut marluk ingerlaneranni 2,8 millioner koruuninnik aningaasaliiffigineqassaaq. Taamaasilluni nutaaliorluni pilersitsiniarneq pillugu nunatsinni meeqqat atuarfianniit ilinniakkat ingerlariaqqiffiusut angullugit aningaasaateqarfimmit ilisimasanik siammerteriffigineqarnerisigut ilorraap tungaanut siuariapiloortoqassaaq.

Qaanaami Avanersuup atuarfiani, Upernavimmi Prinsesse Margrethe Skolenimi aammalu Ilulissani Atuarfik Mathias Storchimi ilinniartitsisut arlaqaaluttut nutaaliorluni pilersitsiniarneq pillugu pikkorissareersimalerput, taakkulu ilisimasatik ilinniartitsisoqatiminnut atuartitaminnullu ilinniartitsissutigissavaat. Atuartitsisullu suli amerlanerusut pikkorissarneqarumaarput.

Atuartut saaffigeqqillugit Margaret Ellis nassuiaaqqippoq:

- Assersuutigalugu niuertarfimmik pilersitsiniaraanni niuertarfittaassamik pisinissamut aningaasanik naammattunik qanoq pissarsisoqarsinnaanersoq aamma nammineq sulisorisassanik atorfinitsitsisoqarsinnaanersoq isumaliutigineqartariaqarpoq. Tamakkulumi anguniarlugit suliniummit ikiorserneqassaasi, taamaasillusi isumassarsisinnaaneq qanoqlu niuernermut ineriartorteqqinneqarsinnaanersoq eqqarsaatigisinnaalissavarsi imminullu sullillusi pisortanngorlusi. Tamakkunatigut ikiorniarpatsigit.

Tamatuma kingorna Margaret Ellisip Air Greenlandip pisortaanera Jacob Nitter Sørensen imminut tunngasumik oqaluttuaqqullugu kaammattorpaa.

Nitterip timmisartumi aquttunngorusunnera
- Uanga timmisartumi aquttunngorusunnikuuvunga, kisiannili nalunarpallaassasoq eqqarsartarpunga. Taamanikkut timmisartuni aquttut tamarmik Norgermeersuullutillu Sverigimeersuullutillu Danmarkimeersuullutillu Tuluit Nunaanneersuupput, taamaammat eqqarsarpunga timmisartumi aquttunngorniarneq nalunarpallaarujussuassasoq. Ilinniartitsisumali oqarfigaanga; ”Jacob, sunngorniaruit sunaluunniit angusinnaavat. Nipituumik oqaatigiinnassavat upperalugulu. Nunanit allaneersutulli pikkoritsigaatit.” Oqaasiilu upperiuarsimavakka. Taamaattumilluuna ullumikkut Air Greenlandimi pisortaanerusunga. Ilissilu arlarsi aamma arlaanni Air Greenlandimi pisortaaninngorsinnaavoq imaluunniit Margaretip oqarneratuut nammineq pisiniarfiutissinni pisortanngorlusi, aalisariussuarmi aquttunngorlusi imaluunniit allarluinnarmik. Tamakkuuppullu ilissinnut ilinniartitsissutiginiakkavut, tassa sunngorusuffigisinnaasarsi suugaluartorluunniit angusinnaalerniassagassiuk, Jacob Nitter Sørensen tuluttut oqaluttuarpoq.

Margaret Ellisip aamma Nitterip marluullutik atuarfimmi ilinniagaqarnissaq atuartitsisullu atuarnermi atuartitsissutaanut tusarnaartarnissaq aammalu atuartut atuarnerminni paasisaqanngikkaangamik tunuarsimaaratik aperisarnissaat pingaaruteqartutut naqissuerpaat. Tamatuma kingorna Margaret aperivoq arlaannik apeqqutissaqartoqarnersoq.

Nukappiaqqat ilaata Nitteri niaqquminik innersuutigalugu kalaallisut aperivoq: “CEO-jungamii?” (pisortaanerugami?) Uppernarsisinneqarami sanilinilu tupaallappasillutik qungujulallutillu imminnut isigitsiariarlutik Nitter nuannaartorerpasillugu isigimmersorpaat.

USA-p nunattalu ukiuni kingullerni suleqatigiinneruleriartornerat tunngavigalugu atsioqiilluni isumaqatigiissusiortoqarpoq.

USAID USA-mi ineriartorneq pillugu allattoqarfiuvoq nunanut allanut ikiuinermik sullitaqarfiusoq.

Aningaasaateqarfik Fonden for Entreprenørskab Kalaallit Nunaat nutaaliorluni pilersitsiniarnissaq pillugu ilinniarfeqarfinnut siammarterinermik suliniuteqarfiuvoq, meeqqat atuarfianniit ilinniarfiit ingerlariaqqiffiusut angullugit siammarterisarfiulluni.

Assit ataani takukkit.

Allattoq assiliisorlu: Káte Hansen, khan@avannaata.gl



Aningaasaateqarfimmi siulittaasoq Jacab Nitter Sørensen aamma Margaret Ellis suleqatigiinnissamik atsioqatigiipput.



Atsioqatigiinnerup kingorna atuartut assiliseqatigineqarput. Saarlerni qeqqaniipput Margaret Ellis, Jacob Nitter Sørensen aamma Palle Jerimiassen Avannaata Kommuniani borgmesteri.