Atuartut issiavimminni aalariassanatik ilinniartitsisorlu Martin Olesen qarasaasiatigut paasiuminaallisaanermi ingerlariaqqiffissami tullermi qanoq suleriaqqittoqarnissaanik seqersittaammi Power Pointimi nassuiaatit tikkuartuutigalugit qallunaatut nassuiaasoq kisiat nakkuppaat. Ilinniartitsisup allap Martinip nassuitigisai atuartunit tamanit paasineqarnissaat qulakkeerniarlugu kalaallisut nutserpai.
Ilinniartitsisup nutserinera naammassiniariartoq atuartut iPaditik ikiorsiullugit suliakkiutigineqartoq suliariniapallalereerpaat. Amerlanerit marlukkaarlutik issiaqatigiipput iPadiminnilu suliaqaatigalutik nipikitsumik oqaloqatigiittarput.
Pulaartut tiguartisimaartut
Avannaata Kommuniani borgmesteri Palle Jerimiassen aamma Avannaata Kommuniani Ilinniarnermut Ingerlatsivimmi pisortaasoq Aka Grønvold atuartut qarasaasiatigut paasiuminaallisaanermut atuartinneqarneranni pulaarsaarneqarsimapput. Pulaarsaaneq kommunip Tusass-illu suleqatigiinnissamik isumaqatigiissusiorsimanerannut attuumassuteqarpoq, tamatumanilu Coding Class-ip – paasiuminaallisaanermi atuaqatigiissut – Kalaallit Nunaannut siammarterneqarnissaa siunertaavoq.
Pulaartut qangaammalli nukappiaqqanik atuartunik oqaloqateqalereerput, suliassaallu suunersut paasiniarlugit. Nukappiaqqat akimmiffeqarpasigatik aammalu iPadiminni tikkuartuutigalutik ulluni sisamani ilikkarsimasatik nassuiaatigaat iPadiminnilu pinnguaatit suut suliarisimanerlugit nassuiaatigalugit.
- Meeqqat Coding Class-imi qarasaasiatigut paasiuminaallisaanermik atuartinneqarnerat tiguartisiffigaara. Qarasaasialerinermi ulluinnarni atorluartakkatsinni suut tunuliaqutaanersut atuartut paasisaqarfigaat. Atuartitsineq taamaattoq atuartut ilaasa qarasaasialerinermik nunatsinni pinngitsoorsinnaajunnaariikkatsinnik ilinniagaqarusulernissaannut ilapittuutaasinnaassasoq neriunarpoq, Palle Jerimiassen Avannaata Kommuniani borgmesteri oqarpoq.
Kommune Kujallermi aamma Qeqqata Kommuniani atuartut toqqartukkat qarasaasiatigut paasiuminaallisaanermik atuartinneqarsimalereerput, uanilu sapaatip akunnerani Avannaata Kommuniani taamatut atuartitsisoqarpoq.
- Atuartut qarasaasiatigut paasiuminaallisaaneq pillugu atuartinneqarnissamut taama periarfissagissaartigimmata usoraakka. Atuartut nassaarsiullaqqissutsimikkut namminneq suliaminnut isornartorsiuisinnaanissaminnut periarfissinneqarnerat aammalu atuartitsissutit akimorlugit suliaqarnissaminnut ilikkagaqarsinnaanerat iluarisimaaqaarput. Atuartut ilinniartitsisullumi atuarfimmi siunissamilu atorluarsinnaasaminnik ilikkagarluarnissaat qularinngilara, Aka Grønvold Avannaata Kommuniani Ilinniarnermut Ingerlatsivimmi pisortaq oqarpoq.
Martin Olesen aamma Nivi Thomassen Olsen Tusass-imi ilinniartitsinermut siunnersortitut atorfeqartuusut Coding Class-imi ilinniartitsisuupput.
Atuartitsinermit assit ataani takukkit.
Allattoq assiliisorlu: Káte Hansen, khan@avannaata.gl
Saamerlerniit: Nivi Thomassen Olsen, borgmesteri Palle Jerimiassen, Ilinniarnermut Ingerlatsivimmi pisortaq Aka Grønvold atuartullu suliaminnik nassuiaasut.
Martin Olesenip Tusass-imi ilinniartitsinermut siunnersortitut atorfeqartup atuartut qarasaasialerinermi paasiuminaallisaanermi suliaannik ikiorpai.
