Kaffisoqatigiinnermi Dronning Margrethep borgmesteri Palle Jeremiassen aamma peqatigiffik Qajaq-p siulitaasua Pia Jensen kiisalu Arnat Peqatigiinneersoq Elin Andersen issiaqatigai.
”Soorunami issiaqatigalugu pissanganarpoq, eqqartorneqarlutillu Kangiata illorsua dronningip qimussertarneri, kalaallit qajaat, nuannaajallaatigeqissaanillu oqaluttuunneqarpoq kalaallit qajartornermi ileqqutoqaat peqatigiiffik Qajaq-mit suli atorneqarmata. Isumaqarpoq spejderit aallarteqqissimanerat pitsaasuusoq, naluaami spejderit nunatsinni ukiorpassuarni uninngasimammata. Qamuteralattarneq ilanngullugu eqqartorparput piffissamilu matumani silami qalipaatit allanngorarsinnaanerat, ilaatigullu illartoqartarluni. Kaffillerneq sivikitsunnguuvoq imartoqisoq”, Elin Andersen taama oqarpoq.
Ulloq 8. oktober 2021 Dronning Margrethe tikimmat qilammit nuiaqanngitsumit seqinnarippoq. Tassani Naalakkersuisut siulittaasuannit Múte Bourup Egede-mit aamma Borgmester Palle Jeremiassen-mit tikilluaqquneqarpoq.
Dronningip Kangiata illorsuanut takornariartinneqarpoq, tassani ”Sermeq pillugu oqaluttuaq – Fortællingen om is” Johan Carlssonimit suliarineqartoq takutinneqarluni.
Ilulissat Kangerluannut angalaarneq
Kingusinnerusukkut Naalakkersuisut siulittaasuat Múte Bourup Egede-mit aamma Borgmester Palle Jeremiassen angalaqatigalugit ualikkut Dronning Margrethe Ilulissat kangerluannut angalaarpoq.
Angalaarneq nalunaaquttap akunnerata affaata missaanik sivisussuseqarpoq, tassani iluliarsuit Dronning Margrethe misigalugit aammalumi arferit marluk takullugit.
”Assorsuaq ataqqinaatigaarput ataqqinartorsuaq kunngikkormiutut ataqqinassusillip Dronning Margrethep tikeraararnera, nalunngilarput assut Kaallit Nunaat nuannarigaa tanngassimaarutigaarpullu illoqarfipput pinngortitarlu kusanartoq takutissinnaagatsigit”, taama oqarpoq Borgmester Palle Jeremiassen.
Allattoq assiliisorlu: Nita Larsen njla@avannaata.gl