iPadilersuineq naammassineqartoq

- Avannaata Kommuniani qarasaasialerinermut siunnersortip kommunitsinni iPadilersuineq maanna naammassisimalerpaa, taamaasillutik illoqarfinni nunaqarfinnilu atuartut ilinniartitsisullumi tamakkerlutik iPadissatik atuartitsinermi atugassaatik piffissami qaninnermi pissarsiarereersimassavaat, Aka Grønvold Ilinniarnermut Ingerlatsivimmi pisortaq oqarpoq.

Taamaasillunilu kommunimi atuartut 1493-iusut, taakkunanngalu nunaqarfinni atuartut 260-it, assigiinngisitaarnerusumik atuartinneqarsinnaalernissaminnut atortussaqalerput.

Alimasissumit ilinniartitsineq aallartinneqarpoq
Avannaata Kommuniani iPadinik pilersuineq ingerlallualereersorlu alimasissumit atuartitsineq aallartimisaarneqarpoq. Alimasissumit atuartitsineq pikkorissarnertut aallartinneqarpoq, tamatumani ilinniartitsisut digitaliusumik atuartitsinermik siunnersuinermillu pikkorissarneqarput, pikkorissarnerallu ukiup matuma naanissaata tungaanut annertusiartortinneqariarluni naammassineqassaaq.

Qallunaatut, tuluttut, matematikkimi, fysikimi aammalu naajuitsulerinermi kiisalu naturfagimi alimasissumit atuartitsineq illoqarfinni atuarfinnit marlunnit ingerlanneqarpoq. Atuarfik Jørgen Brønlundimit atuartitsisut marluk alimasissumit Uummannami Qaarsunilu atuartitsipput. Atuarfik Mathias Storchimit atuartitsisoq ataaseq alimasissumit Oqaatsuni atuartitsivoq kiisalu Uummannami Atuarfik Edvard Krusemit atuartitsisut marluk alimasissumit Saattuni Ilimanamilu atuartitsipput.

Alimasissumit atuartitsinissanik pilersaarusiornerit nunatsinni kommunit suleqatigalugit kiisalu Danmarkimi ilinniarnermut ilisimatusarfik aammalu ilinniartitaanermut aqutsisoqarfik qanimut suleqatigalugit Kivitsisamit pilersaarusiorneqartarpoq.

Kommunimi iPadinik pilersuineq ukiut pingajussaat qiteqqullugu matuma siorna Ilulissani aallartinneqarpoq.

- Pilersuinerup ingerlanerani tulluussaasoqarpoq. Assersuutigalugu Qaanaami nunaqarfiinilu atuarfiit iPadissatik ukiup affaanik kingusinaarnerusumik pissarsiaraat, upernaarlu sila peqqutigalugu aammalu qarasaasialerinermut siunnersortip iPadilersuinermi kisermaassisup suliassani aallaavigalugit angalanissani pilersaarusiortariaqartarmagit Upernavik nunaqarfiilu qaammatinik aqqanilinnik kinguaattoorfiusumik pilersorneqarput, Aka Grønvold nassuiaavoq.

Meeqqat atuarfianni ilikkagaqarsinnaanerup qaffassarneqarnissaa suliniummi Kivitsisami siunertaavoq.


Suliniut Kivitsisa aningaasaateqarfinnit Villum Fonden, Hempel Fonden, A.P. Møller og Hustru Chastine Mc-Kinney Møller Fond kiisalu Oak Foundation Denmark-imit tapiissuteqarnikkut tunngaviligaavoq, aningaasaateqarfiillu suliniutip aqutsisoqatigiivini sinniisuutitaqarput.

Allattoq assiliisorlu: Káte Hansen, khan@avannaata.gl