airplanebooksbriefcase business cogs cross election entertainment fish house law lockmedicalpeopleselfservices socialtax

Coronamut tunngatillugu eqqarsaatigilluakkanik malittarisassanik amigaateqarneq

24. november 2021

Allattoq: Palle Jerimiassen (AT), Avannaata Kommuniani borgmesteri

Aallaqqaammut oqaluttuarilaassavakka Upernavimmi Kommunitsinnut ilaasumi coronaqartoqarnerani pissutsit pissutaallutik qanoq unammilligassaqartigaluta. Siullermik pingaaruteqarpoq erseqqissaatigissallugu maani Avannaata Kommuniani atukkagut immikkuullarissuummata.

 Nunaqarfitsinni najukkat amerlavallaanik inoqarput, tamatumani angerlarsimaffiit 30 %-tii eqqartorneqarlutik. Angerlarsimaffiit inoqarpallaartut imatut paasineqassapput, inimi ataatsimi inuit marluk pingasulluunniit najugaqartarlutik, igaffik, uffarfik isaariarlu eqqarsaatigissanngikkaanni.

Ima paasineqassaaq, angerlarsimaffiit amerlavallaanik inoqarneri pissutaallutik coronamik tuniluunneq Kalaallit Nunaata avannaani sukkasoorujussuarmik ingerlasinnaalluni. Taamaattumillu tupinnartuunngilaq piffissami matumani Upernavimmi tuniluunnerup taama annertutiginera.  

Kommunimi aaqqissuussaanermut atatillugu coronamik tuniluunneq qiviarutsigu, tamanna pissusissamisuunngilaq. Upernavimmi utoqqaat illuat sulisunik aalaakkaasunngitsunik ajornartorsiuteqareerpoq sulilussaaleqinermillu ajornartorsiuteqarluni. Tamanna suli ajornarnerulerpoq utoqqaat illuani coronartoqarnera pissutaalluni. Taamaattumik coronamik tuniluunneq annertunerulissappat assut unammillernartussaavoq.

Illoqarfimmi nassaassaapput ulluunerani paaqqinnittarfiit marluk  taakkunanilu aamma sulisussanik ajornartorsiuteqartoqarluni. Nalunaarfigineqarpunga sulisut tamangajammik coronamik ersiuteqarnertik pissutigalugu angerlarsimasut. Tamanna ima paasineqassaaq misissortittariaqartut akissutisinnissamillu tungaanut angerlarsimassallutik. 

Soorlu oqaatigineqartoq kommunimi paaqqinnittarfiit matuneqarnissaat aarlerinartorsiorpoq sulisut amigaataanerat pissutaalluni. Neriuppunga takusinnaagissi qanoq oqariartuuteqarniartunga – coronamut eqqarsaatigilluakkamik suleriutsimik suliaqartartoqanngippat, tamanna inuiaqatigiinnut kinguneqarnerlussinnaavoq. Pingaaruteqarpoq kommunini paaqqinnittarfiit pitsaasumik inuttaasunut sullissinissaat pingaaruteqarpoq, uanilu aalajaatsunik sulisoqarnissaq annertuumik pingaaruteqarpoq. 

Takoreerparput peqqinnissaqarfimmi misissuisinnaaneq killeqartoq. Sulisuvut misissortissinnaanngikkunik imaluunniit misissuinerit inernerinik pissarsisinnaanngikkunik suliartorsinnaanngillat. Peqqinnissaqarfik siornatigut tatisimaneqareerpoq, aammalu inuiaqatigiinni tuniluuttumik (soorlu coronamik)  nappaalasoqartillugu tatisimaneqarnera annertusissussaalluni.  Taamaattumik peqqinnissaqarfiup tatineqarnera annertusissanngilaq, taakkuami suliassaraat inuttaasunik paarsinissaq, tamannalu annikillisarneqassanngilaq.

Ajornartorsiutit arlallit taakkartorsinnaagaluarpakka tamannali iluaqutaanngilaq. Taamaattumik aaqqiissutaasinnaasunik siunnersuuteqassaanga innuttaasullu akornganni  toqqissimanermik pilersitsisinnaasunik  tikkuussillunga: 

 

  1. Danmarkimi tuniluunneq annertuvoq, ullut tallimat mattusimanissaq misissortinnermilu aatsorneqarsimannginnermik uppernarsaat nunatsinut eqquteqqinneqarlik
  2. Coronap aqunneqarsinnaalernissaata tungaanut najugaqarfiit matullugit, assersuutigalugu piffissami matumani Upernavik.
  3. Misissortinnissamut atortut annertusillugit, ima oqaatigalugu illoqarfiit tamaasa misissuutinik pilersorlugit. Tamanna pisinnaanngippat misissuigasuarnermut atortunik illoqarfiit tamaasa pilersornerisigut, taamaalilluni nappaammik ersiutillit tamarmik misissortinnissamut periarfissaqalersillugit.
  4. Pisussat tuniluuffiusinnaasut killilersorneqarlik.

 

Ullumikkut Naalakkersuisut corona pillugu suleriuseqanngillat. Tamanna inuiaqatigiinnik toqqissisimannginnermik pilersitsivoq aammalu inuussutissarsiortuni aalaakkaannginnermik toqqissisimannginnermillu pilersitsilluni.  Erseqqissaatigissavara qulaani taakkartorneqartut tuniluuttoqarnerani atuutissammata. Tamanna ingerlariaqqissagutta toqqissisimaneq patajaatsuussuserlu pisariaqartippagut.   Taamaattumik Naalakkersuisut qinnuigaakka pissutsit pimoorullugit tigussagaat aammalu corona pillugu eqqarsaatigilluakkamik suliusissamik suliaqaqqullugit.   

 

Palle Jerimiassen

Avannaata kommuniani borgmesteri