Kommunimi inuttaasunut suliffeqarfinnullu aalisarneq pingaaruteqartorujussuuvoq, taamaattumillu allannguinerit eqqarsarluaqqaarluni ingerlanneqartussaallutik. Taamaattumik Naalakkersuisut umiatsiaararsortut pisassaasa qaammammukkaarnerisa atorunnaarsinneqarneranik iliuuseqarsimanerat pillugu isumaqatiginngilakka. Tamanna akuerineqarsinnaanngilaq aammalu inuttaasunit suliffeqarfinnit kommunimillu attanneqarsinnaanani.
Siorngatigut misigisareerparput pisassat ikioq qiteqqutiinnartoq nungunneqartarneri, taamanikkullu kingunerisaat annertoorujussuullutik. Tamannalu Naalakkersuisut misigisimanngilaat, tassami pissutsit piviusut ungasissorujussuugamikkit. Taamaattumik ajornanngitsuararsuuvoq allannguinissaq. Uagulli misilittakkagut tassaapput suliffissuarmi sulisut suliffissaarunneri. Kingunerisaa tassaavoq sulilluartunik sulisussarsiornerup ajornakusoorsinera. Aalisakkanik suliffissuarmi sulinerup kajuminnartunngortinnissaa sulissutigaarput. Allannguinerilli ingerlanneqarsimasut tamanna angujuminaatsunngortippaat.
Aalisarneq siulliuniarnermik ingerlanneqartarpoq. Taamaattumillu aalisartut siulliuniarlutik assut ulapputtarput, uanili ajornartorsiut tassaavoq, tamanna aalisartunut tamanut atuummat. Naggataatigullu tamanna ima isumaqarpoq pisassiissutit sukkasuumik nunguttussanngorneri. Ukioq qiteqqutiinnartoq aalisarneq ataannassalluni tunngavissaarutissaaq. Tamanna siorngatigut misigereernikuuvarput aammalu tamanna ilaqutariippassuarnut taakkualu meerartaannut annertuumik kingunipilutsitsivoq. Aalisartumut suliffik taarsissallugu oqitsuinnaanngilaq. Taamaattumillu sianiilliorneruvoq isumaqassagaanni, assersuutigalugu aalisartoq assassortartunngorsinnaavoq arfineq pingasuniit sisamanut sulisartoq.
Taamaattumik suli paasisinnaanngilara sooq Naalakkersuisut ukiumit nutaamiit atuutilersussamik allannguiniarnerat. Tamanna eqqarsaatigilluagaanngilaq ukiullu kingulliit qulit aaqqissuussaanermik suliarisimasatsinnik aseruisuulluni. Isumaqarpunga aalisarnermi piujuartitsineq eqqarsaatigalugu aaqqissuussineq nassaarisimagipput. Uani eqqarsaatigaara suliffissuit ukioq tamaat sulisitsisinnaanerat ullullu aaqqissuussaanerat, taamaaliornikkullu nunanut allanut niuerneq ingerlanneqarluni. Aalisartup ilaquttani pilersorsinnaavai aaqqissuussaasumillu ulluinnarni inuuneqarluni.
Taamaattumik neriuutigaara Naalakkersuisut aalajangiinertik allanngortissagaat, taamaaliornikkut pisassiissutit qaammammut tunniunneqartarneri ingerlanneqaqqilerlutik.
Allattoq : Palle Jeremiassen, (AT) Borgmester Avannaata Kommunia