Natersuaaraq aappaluttoq siaarneqarsimavoq timersortartunut ilaqutaasunullu qaaqqusanut. Nipilersortunik akunniliisoqallattaarpoq akissarsitinneqartunullu tamanut oqalugiartoqarluni.
”Ataatsimoorluta ullugissaavippugut. Corona pissutaalluni aaqqissuussaq matoqqavoq, tassami illoqarfiup innuttai tamaasa qaaqqusaraluarpagut Timersullammaat nalliuttorsiutiginissaannut. Naak ukioq manna taamaattoqarsinnaanngikkaluartoq malunnarluarpoq timersortartut nuannisaartut”, Linda Jerimiassen, pitsaaliuinermi siunnersorti aaqqissueqataasorlu oqarpoq.
Komité-p piukkussat arlaqartut aallaavigalugit akissarsitinneqartussat toqqarsimavaat, tamarmik immikkut oqaatsinik nersorinnissutinik oqaaseqarfigineqarsimapput.
Ukioq 2021-mi timersullammami toqqarneqartut tassaapput:
• Suniusaallammak; Pia Jensen & Kaaspaaraq P. Schmidt, Qajaq Ilulissat
• Ukiup iligiivi; I-69 Futsal arnat inersimasut
• Ataqqinaammik nersornaat; Rigmor Villadsen
• Timersoqatigiiffilerillammak; Pia Jensen, Qajaq Ilulissat
• Neriunaatilimmut kajumissaat “Talent”; Inutsiaq Davidsen N-48
• Timersullammak 2021; Lars Erik Reimer N-48
