Borgmester Palle Jerimiassen (AT) GE’p Ilulissani immikkoortortaqarfia ataatsimeeqatigisimavaa, sanaartornermi atortussat amigaataaneri eqqartorniarlugit. Sanaartortut atortussat amigaatigaat qangali Aasiannut Ilulissanullu tikittussaasimangaluartut.
Maannaqqinnaaq sanaartortitsisut ingerlasinnaapput, kisiannili sapaatit akunnerini 4-ni utaqqeqqissangunik, taava tigussaasumik uagutsinnut ajornartorsiutinngussaaq, Karl Jensen nassuiaavoq, taanna GE’p Ilulissani immikkoortoqarfiani siulittaasumut tulliuvoq.
Sakkortuumik inassutigerusuppara Royal Arctic Line-p ajornartorsiut pimoorussamik qiviassangaa, pisiniarfinnimi nerisassaannaat amigaatiginngilagut, aammali sanaartorneq annertuumik eqqungaavoq. Sakkutuut umiarsuaat sikumik aserorterinermi ikiuussinnaangaluarpoq, taamaasilluni umiarsuit avannamukarsinnaaniassammata, Palle Jerimiassen oqarpoq.
Umiarsuaq pilersuisoq Mary Arctica kingullermik Ilulissaniippoq januaari qiteqquttoq.