Paasinittaasera imaappoq, mittarfik kommuneqarfimmut tamarmut aningaasatigut qaffariarujussuartitsissaaq. Taamaattumik illoqarfiup ineriartortitaanissaanut pilersaarusiorsimavugut, tassuunalu inuussutissarsiornikkut soqutigisatigut pisariaqartitat matussusernissaannut imaqartinneqarpoq. Assersuutigalugu illoqarfimmut takornarissat amerlanerusut tikerassapput. Tamatuma kinguneranik illoqarfik sulisinnaasunik amerlanernik pisariaqartitsilissaaq, kingunerisinnaallugulu naggataagut, inissianik pilersitsiortornerp annertusarnissaa. Mittarfittaassaq inuiaqatigiinnut sunniuteqassaqaaq.
Nuummi mittarfissuaqarneq pillugu isumasioqatigiisitseqqammerpunga, tassuuna nalunaarsuiniarluta ajornartorsiutaasinnaasunik assigiinngitsunik illoqarfiup ineriartortinnissaanut akornutaasunik. Tassani erngup katersap killeqarfia akornusiivoq annertuumik. Uannut kommunalbestyrelsimullu paasiuminaatsuuvoq qanoq isillutik Namminersorlutik Oqartussat ajornartorsiummut tamamunnga paatsuugassuteqarsinnaanerat.
Mittarfeqarfiup kingunerissavaa illoqarfiup allilernissaa, taamasiornissamilu periarfissaqarpallaanngilaq, tassa UNESCO illoqarfiup kujataatungaanut killilersuimmat. Taamaattumik aalajangiisuussaaq ataatsimoorussilluta aaqqiissusiinissarput. Ajoraluartumilli paasinnittaasera imaappoq, Namminersorlutik Oqartussat aningaasaliissutissanik amigaateqarmata imaluunniit aaqqiissusiornissamut soqutigisaqannginnamik. Maannamut sinaakkusiussat allanngortinneqanngippata, taava killiffitsinniit nikinnaviissuugut tamatsinnit attanneqarsinnaanngitsumik.
Soorlu aallaqqaataani oqaatigigiga, taava tamatta akisussaaffimmik tigusisariaqarpugut, taamaasilluni mittarfittaassaq kommunerisatsinni atugarissaarnissamut qulakkeerinninnikkut tapertaalerniassammat.Uannut kajumissaataanngerujuppoq Namminersorlutik Oqartussat suleqatiginissaat ima soqutigisaqanngitsigimmat allaat tigussaasumik suliniummut ingerlatamut pilersaarusiorsimanatik. Kommunemiit iliuuseqartoqarsimaqaaq, pilersaarusianik suliaqarfiusimavoq, iliuusissanik aningaasaliissutissanillu illikartitsilluni. Taamaattumik iluunngarlunga qinnuviginnippunga, Namminersorlutik Oqartussat akisussaaffimik tigusinissaannik kommunemillu suleqateqarnissaannik suliniut ataatsimoorussinnaaqqullugu, nunatsinnut tamarmut iluaqutaasussatut.
/Palle