airplanebooksbriefcase business cogs cross election entertainment fish house law lockmedicalpeopleselfservices socialtax

Piniarnermut aalisarnermullu saqqummersitsinersuaq PolarExpo iluatsilluarpoq

PolarExpo Ilulissani ingerlanneqartoq saqqummersitseqataasunit tigulluarneqarpoq. Saqqummersitsineq suli taamaatinngikkaluartoq Ilulissani piniarnermut aalisarnermullu saqqummersitsinersuaq iluatsilluar-tutut oqaatigisariaqarpoq.
13. oktober 2022

Saqqummersitseqataasut 48-ooruusut Kalaallit Nunaanneersut, Danmarkimeersut, Islandimeersut, Sveri-gemeersut aamma Savalimmiuneersut Ilulissani timersortarfissuaq ulluni kingullerni ulikkaarsimavaat, sulilu takuniaasut kisitsisitalerneqanngikkaluartut aaqqissuisut naatsorsuutigaat 2.000-it pallillugit takuniaasoqar-simanissaa, taamaattumillu timersortarfissuaq inugasaarsimaqaaq.

PolarExpo Fishing & Hunting, tassa taamatut pisortatigoortumik taaguuteqarpoq, aaqqissuunneqarlunilu Aalborg Kongres & Kultur Center-imit, Avannaata Kommunianit aamma KNAPK-mit.

Tuniniaaneq aamma pisisartunut attaveqarneq

Saqqummersitsineq inuutissarsiut pillugu saqqummersitsineruvoq, inuussutissarsiortut aalisarnermi piniarnermilu atortut sakkullu tuniniakkatik saqqummersitsisuullutik. Saqqummersitsinermi aallaavigatigut siunertaanngilaq tuniniaanissaq, taamaattorli saqqummersitsisut ilarpassui sapaatip akunnerata ingerlane-rani niueqateqarsimapput.

”Tamaasa. Nassatagut tamakkerlugit tunivagut. Marloriaataanik amerlatigisut tunisimasinnaangaluarpa-gut.” Taama oqaluttuarpoq Geert Gregersen GG-Tubs-imeersoq, Islandimi SÆPLAST-imi aalisakkanut kar-sinik kiffiakkanik tuniniaasoq.

Suli karsinik saqqummersitsivimminiititaqarpoq. Oqaluttuarpoq tamarmik pisiarineqareersut, pisisimasulli pisiatik tigunissaannut utaqqisariaqartut saqqummersitsinerup naammassinissaanut, saqqummersitsinermi takutitassaqarniassagamik.

Tv: Geert Gregersen, GG Tubs. Th: Sævaldur Jens Gunnarsson, SÆPLAST

 

“Maaniippugut pisisartunik naapitsinissarput pinerullugu. Pisisartummi anginerusut isumaqatigiissuteqarfi-gereernikuuagut, nioqqutissiagullu nalunngilaat. Kalaallit Nunaannut pitsaasumik attaveqarpugut, taman-nalu isumagilluarusupparput.” Geert Gregersen saqqummersitsinermi sooq peqataanertik nassuiarpaa.

”Taavalu aamma tunisassiaatigut mikinerusut 65L aamma 220L arlallit qimmilinnut tunivagut, taakku qim-minut nerukkaatissaminnut kiffiagaammata atorusukkamikkit. Taamaammat iluarisimaarparput maaniis-sinnaagatta tuniniakkagullu inunnut takutillugit, uffa immaqa ilisimareeraluaraatigut.” Oqaluttuarpoq.

”Saqqummersitsineq iluarisimaarluarparput, soorunamilu 2024-mi peqataaqqissaagut.” naggasiivoq.

 

Ullorsiutini periarfissaq

Saqqummersitsisoq alla, Jørk Rudolph, Randers-imi Nordhavn Power Solutions-imeersoq oqaluttuarpoq saqqummersitsinerup oktoberimi Ilulissani ingerlanneqarnera imminerminnut tulluarluinnartoq.

”Uagutsinnut pingaaruteqartorujussuuvoq maannarsinnaanerput pisisartugullu naapillugit. Aamma okto-berimi pinera uagutsinnut iluarpoq. Tassami aalisarneq pillugu saqqummersitsinersuarnut allanut peqa-taaffigisartakkatsinnut, soorlu Tysklandimi SMM, Savalimmiuni Atlantic Fair, Dan-Fish, Norge-mi Nor-Fishing aamma Icelandic Fisheries, piffissamik qalliinnginnami.” Jørn Rudolph oqaluttuarpoq.

Jørk Rudolph, CSO, Nordhavn Power Solutions

 

”Nalunartuaannarpoq uuttussallugu saqqummersitsinermi peqataanikkut qanoq pissarsiaqarsimanerluni, maaniinngilagummi tuniniaajartorluta, kisiannili pisisartunut attaveqarnerput eqqarsaatigalugu nutaanillu attaveqaatinik pilersitsiniarluta. Motoorili tuneqqammerpara, motooriiarsimasumut, tamannalu ajunngil-luinnarpoq. Maannakkorpiarli nioqquteqarnissarput salliutillugu maaniinngilagut.” Jørn Rudolph oqalut-tuarpoq.

”Ilulissat saqqummersitsinissamut periarfissagissaarput, akunnittarfiit pitsaasut avatangiisillu nuannerluin-nartut. Neriuutigivarali nassiussiniarneq akunnittarfiillu il.il.  eqqarsaatigalugit pitsaanerusunik isumaqa-tigiissusiortoqarsinnaanera. Tassami saqqummersitsineq manna uagutsinnut peqataaffigissallugu akisuner-paajuvoq. Taamaattorli 2024-imi peqataaqqikkusussinnaavugut.” Jørk Rudolph naggasiivoq.

 

Inuussutissarsiutigalugu sulialimmit - inuussutissarsiutigalugu sulialimmut

Nuuk Viking Service atallaanik annanniutinik, annanniutinik pullattakkanik ajutuulernermilu kalerrisaaruti-nik tuniniaasoq Ilulissani saqqummersitsineq pillugu nersualaarinnippoq.

”Saqqummersitsineq iluarisimaarparput. Ilulissani unnuisarfigissaarpoq, malugisinnaavaralu maani saqqum-mersitsinermi inuussutissarsiortut amerlasuut najuupput, misigisartakkatsinnit amerlanerullutik. Nammi-neerlunga saqqummersitsinerni ukiuni 12-13-ni peqataasarsimavunga. Inuussutissarsiutigalugu ingerlatsi-sut taakkuupput pingaarnerpaatut saaffigisagut, taamaammat iluarisimaarinnilluarpugut. 2024-mi peqa-taaqqinnissarput qularineqassanngilaq.” Jakob Rosing oqaluttuarpoq.


Tv: Jakob TH. Rosing, Nuuk Viking Service. Th: Kristian A. Sørensen, Nuuk Viking Service.

Saqqummersitsineq matussaaq sisamanngornermi 13-10-2022 nal. 17, ingerlateqqinneqassallunili Ilulissani 2024-imi.