Angalaneq pissarsiaqarfiulluarpoq, ilaatigut nipilersornermik ilinniarfik, innuttaasut illuat atorluarneqartoq inuusuttunullu atuagarsornikkut nukittuallaanngitsunut periarfissat soqutiginartut nutaat.
“Agguataarluta isumaqatigiissuteqarfigisimasagut pulaartarpagut, paasisaqarfigeqaagullu. Kommunit akimorlugit unammilligassat pilersikkumasallu assigiipput, taamaammat pingaartuuvoq allat ilisimasaasa misilittagaasalu naleqqussarlugit atorluarneqarsinnaaneri,” taama oqarpoq Lena Ravn Davidsen, Avannaata Kommuniani Inerisaaneq pillugu ataatsimiititaliami siulittaasuusoq.
Avannaata Kommuniani politikkikkut ataatsimiititaliat ataavartut arfineq marluupput, taakkulu tamarmik immikkut ukiumut ataasiarlutik paasisassarsiorlutik angalasinnaatitaapput, isumassarsiorlutik, suliaminnut atatillugu ilisimasaqarnerulerumallutik, attaveqaatissarsiorlutik aammalu kommuninik allanik nunaniluunniit allani suleqatissarsiorlutik.
