airplanebooksbriefcase business cogs cross election entertainment fish house law lockmedicalpeopleselfservices socialtax

Qaanaami Qaanaallu eqqaani piniartut ikiorserneqarnissaat pisariaqarpoq

Pisormi immikkuullarissuuvoq inatsitigullu periarfissaritinneqartut uani pisumut
tulluutinngillat
20. december 2022

Qaanaami Qaanaallu eqqaani piniartut ikiorserneqarnissaat pisariaqarpoq tuaviortumillu tamanna ingerlanneqartariaqarluni.

Ukiuni kingullerni silaannaap allanngoriartornerata kingunerisaanik piniartut atugaat annertuumik ilungersunarsingaluttuinnarnikuupput aamma tamanna pillugu Naalakkersuisut Avannaata kommunianiit ilisimatittuartarnikuuagut immikkullu Qaanaap eqqaani iliuuseqarnissaq oqariartuutigiuartarnikuullugu.

Sualummik kaperlaap nalaani sikuusarnerata allanngornerata silallu unerisimuannaarnerata taarsuup nalaani piniariarsinnaaunnaartitaanerat innuttaasunut ilungersunartumik kinguneqarpoq.

Sikumi aalisarsinnaanerat piniariarsinnaanerat siusinnerusukkut septembarip naanerata nalaani oktoberilluunniit aallartisimanerani aallartinneqartarsimagaluartoq ukiuni kingullerni kinguaraluttuinnarnikuuvoq massakkut decembari naalerpoq suli siku atorneqarsinnaanani.

Taarsuup ataani piniariartarnerat unippoq sikoqanngimmat immakkullu piniarsinnaanngillat taartumi piniagassat takuneqarsinnaanngimmata. Aalisarneq sikukkut ingerlanneqartaraluartoq aallartikkaluaannarluni unippoq siku anorersuarnit sequtserneqarmat.

Tamakkua pissutsit ukiuni kingullerni uteqqialernerat Naalakkersuisunut Borgmesteritut arlaleriarlunga annguttarpakka immikkut eqqumaffigineqarnissaat paasitikkumallugu, ajoraluartumik Naalakkersuisuniit iliuuseqartoqarnikuunngilaq.

Thule Fond aqqutigalugu sikuunnginnerani aalisarsinnaanermut periarfissaasinnaasunik suliaq ingerlasoq corona-mit unitsitaanikuusoq ingerlateqqinneqarpoq tamannalu isumalluarfigaara, tamannali aatsaat aasaru tamakkiisumik ingerlalersinnaalluni.

Naalakkersuisut arsaq kommunimut milorujuppaat oqarlutik ikiorsiinerit kommunip ingerlattariaqarai, tamanna imminerminit ajunngilaq, ikiorsiisarnermut inatsisit malillugit ikiorneqarniarlutik saaffiginnittut naatsorsuuttikkusuttullu kommunimiit ingerlanneqassapput, kisianni Naalakkersuisut nalunngilluinnarpaat aalisartut piniartullu namminersortutut ingerlasut taamatut taperneqarsinnaanerat killilerujussuusoq.

Taamaattumik silaannaap allanngoriartornerata sunniutai pillugit immikkut tuaviornerpaamik tapiisoqarsinnaanera Kommunip Naalakkersuisullu aaqqiivigisariaqarpaat inatsisit atuuttut saniatigut. Pisormi immikkuullarissuuvoq inatsitigullu periarfissaritinneqartut uani pisumut tulluutinngillat.

Pikkorissartitsinerit, allatigullu aaqqissuussisarnerit piniartut uninnganeranni periarfissat kommunimiit sillimaffigaagut aallartisarnissaannullu piareersarluta.