airplanebooksbriefcase business cogs cross election entertainment fish house law lockmedicalpeopleselfservices socialtax

Ukiuunerani takornariaqarneq ataatsimuussusermik ikinngutigiinnermillu killissanik pilersitsissooq

”Ilulissani mittarfittaassaq 2024 ammarneqartussaq, inuit qaninnerulersissinnaavai politikkikkullu tamanna qulakkeerneqassaaq, pisartut assigiinngitsorpassuit siammasissumik ineriartortissallugit, sumiiffitsinni tulluussimaarutigisinnaasagut ukiuuneranilu takornariaqartalernissamut kusanartumik sinaakkusiissalluni,” taama oqarpoq Avannaata Kommuniani borgmester Palle Jerimiassen
1. februar 2023

Ulluni makkunani Canada-mi Avannaata Kommunia-niik timersortartut kusanartunik ujaminnattaqattaarput Arctic Sports-imi Dene Games-imilu. Unamminerit aallartiinnartut ulloq siulleq unammiat ass. Ikerasak-miik Ilulissaniillu ujaminnareerput kuulti bronze-lu.

 

Ukioq manna Arcitc Winter Games-imi unammersuarnerit canada-mi illoqarfimmi Wood Buffalo-mi ingerlanneqarput. Borgmester-i Palle Jerimiassen tullersortaalu viceborgmester Sakio Fleischer (S) Canada-miipput suliniutigalugu, kommune 2025-mi "Avannaa Arctic Games" Ilulissanut qaaqqunissaat. 

”Peqatigiiffippassuarnik kommune-tsinni peqarpugut kujalitsinniik avannamut pikkorittorpassuarnillu unammisartuuteqarlutalu sungiusaasoqarpugut. Aamma inuusuttuaqqat pimoorussillutik timersuutinut pikkorissarput tamannalu kommunalbesltyrelse-p kissaatigaa ukiuunerani takornariaqarnermut atasumik ineriartortitsinissaq kultur-erput oqaluttuarisaanerpullu soqutigineqarnerulersillugu,” Avannaata Kommuniani borgmester Palle Jerimiassen oqarpoq.

Piffissaq takorneriarfiusoq sivitsorneqassaaq

Ullumikkut piffissaq takorneriaqarfiusoq kommune-qarfiup iluani taamaallaat qaammatit pingasut sisamaannaapput. Tamannalu isumaqarpoq, akunnittarfiit unnuisarfiillu allat  ukiup ilarujussua inoqarneq ajorlutik. Taamaattumik Avannaata Kommunia-ni kommunalbestyrelse-p piffissaq takornariarfiusartoq sivitsorusuppaa, taamaalilluni ukiukkut piffissallu takorneriaqarfiusut akunnerisigut takornarianik takkuttoqartalernissaa anguniarlugu.

Ilulissat 2024-mi mittarfittaaq ammarneqartussaavoq tamannalu isumaqarpoq ineriartornissamut aningaasarsiorluarnissamullu periarfissat annertusissallutik. Kisianni  aningaasaannaat eqqarsaatigineqanngillat, borgmester oqarpoq.

”Kissaatigaarput takorneriaqarnermut sinaakkutit pitsaasut nunaqavissut peqatigalugit ingerlannissaat, taamaalilluta periarfissagissaarnerulissagatta oqaluttuarisaanitta kultur-ittalu immikkuullarissup timersornernikkut kultur-itsigullu aaqqissuunnerisigut takutissinnaalernissaat”, Palle Jeimiassen oqarpoq.

Mittarfittaassap nunarsuaq Avannaata Kommunianut qaninnerulersissavaa tamannalu periarfissatsialak takornarianut nunaqavissunullu periarfissiissaaq.

”Pissusissamisoorpoq nunanut allanut peqatissarsiorneq, piorsarsimassuserput oqaluttuarisaanerpullu ataatsimut aallutissallugu. Ukiumi takorneriaqarneq pitsaasumik sinaakkutalik ataatsimoorfiusinnaavoq, inuit ataatsimuulersillugit ikinngutigiinnernillu akunnitsinni pilersitsiviulluni,” Palle Jerimiassen oqarpoq.

Politiker-it qulakkeereerpaat, Piniarnermut Aalisarnermullu takutitsinissat siunissami ukiut allortarlugit Ilulissani ingerlanneqartalernissaa aalajangerneqartoq – tulliani 2024-mi.

”Piffissat takorneriaqarfiunerusut saniatigut periarfissatsialannik inerisaaleruttorpugut”, politikkikkut oqariartortoqarpoq.

Taamaattumik borgmester-i taassumalu tullersortaa Saiko Fleischer (S) Canada-mi ataatsimeeqattaarput neriuutigalugu, inernera imaakkumaartoq, Avannaata Kommunia periarfissinneqassasoq "Avannaa Arctic Games" 2025-imi  aaqqissuinissaminut periarfissinneqassasoq.

”Torrassangaluarpoq. Piginnaasagut misilittakkagullu inerisaleruttorpagut, kommune-tsinni qammaanissatsinnut ukiuunerani unamminerit taamaattut aaqqissuunneqarnissaannut”, Palle Jerimiassen oqarpoq.

Juli 2023-mi ICC (The Inuit Circumpolar Council) Ilulissani ataatsimiissooq, nunat ICC-mi ilaasortat naapissallutik kultur-ertillu pitsaanerpaanik takutissallugu.

ICC inunnut 180.000 missaaniittunut sinniisuuvoq, nunarsuatta avannaarsuni inuusunut; Alaska, Canada, Chukotka kiisalu Kalaallit Nunaat.