Kajumissutsiminnik qatserisartut namminersortumik nersorneqartut aningaasanik tunineqarlutik
Qujamasuutissaavoq Oqaatsuni kajumissutsiminnik qatserisartut tallimat sukkasuumik ilisimaarinnittumillu nunarfimmi illu upernaaq ikuallaleraluartoq qamimmassuk.
”Kajumissutsiminnik qatserisartut akuttusoorujussuarmik suliaminnut tunngasumik nersorniarneqartarput, kisianni massakkut nersorneqassapput,” taama oqarpoq John Stavensø Hansen, sanasuni ST & Søn ApS-imi Ilulissani piginneqataasoq.
Kajumissutsiminnik qatserisartut tallimat tamarmik immikkut nersorneqarnermik saniatigut 1000 kr-mik ST Søn ApS-imiik pissarsitinneqarput.
John Stavensø Hansen isumaqarpoq, kajumissutsiminnik qatserisartut akuttuallaartumik nersorniarneqartartut.
”Tamattami iliuuseqarsinnaavugut qatserisartut nersorniarnerinut neriullungalu, tamanna aamma allat saaffiginninnissaanut kajumissaataassasoq. Tassami nunarfimmi Oqaatsuni pisoqarmat katersuutipallannikkut, ikuallanneq qamipallanneqarsinnaasimavoq,” taama oqarpoq John Stavensø Hansen, namminerlu siusinnerusukkut kommune-mi ukiuni 8-ni qatserisartuni ittuusimasoq.
Oqaatsuni ikuallanneq aallartissimassangatinneqarpoq, kiassaat uunnappallaarsimammat nunaqarfimmilu qatserisartut ilaannik takuneqarsimalluni illumiik pujuleriasaartoq. Qatserisartoqatini kalerrissimavai taavalu qatserummik qatseralutik qamissimallugu annertuumik ajoqusernernissaraluaq pinngitsoortillugu.
”Imermik atugaqanngivissimapput, qatserutaannaalli atorlugit ikuallanneq qamissinnaammassuk tupinnarpoq.”
Illutoqqami iikkat sannakuaqqanik kiffiuteqarsimapput, ikuallannerullu siaruapallassimannginneranut pissutaassangatinneqarpoq iikkat issungaatsiartumik pappialaqarsimanerat.
John Stavensø Hansen eqqaamavaa, nammineq kajumissutsimik qatserisartussarsiorneq qanoq ajornakusoortigisoq, taamani pisortaagallarnermi nalaani.
”Kisianni oqarsimavoq, taava aamma arnanik qatserisartoqartariaqartoq. Taava taamaalilluni arnanik qatserisartutut qinnuteqartoqarsinnaalerluni,” taama utoqqaq qungujorujulluni oqarpoq.
