airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommuniani pisortaaneq atorfinitsinneqartoq

30. august 2017
Avannaata Kommuniani Ikaarsaariarnermut Ataatsimiititaliap ulloq 24. august ataatsimiinnermini Avannaata Kommuniata Pisortaanissaatut Sivso Dorph atorfinitsinniarlugu aalajangerpoq. Sivso Dorph 1. oktober atorfinissaaq. 

Sivso Dorph ullumikkut Qaasuitsup Kommuniani Atuarfeqarnermut, Kultureqarnermut Sunngiffimmullu Ingerlatsivimmi pisortatut atorfeqarpoq.

Avannaata Kommunia ukiuni aggersuni, kommunitut nutaatut aallartisarnissamini annertuunik unammilligassaqartussaavoq, taamaattumik Ikaarsaariarnermut Ataatsimiititaliamit nuannaarutigineqarpoq Kalaallit Nunaanni inuiaqatigiit ingerlatitaanerannik, kommunimi nuna tamakkerlugulu politikkikkut ingerlatsinermik, pisortani sulinermik suleriutsinillu misilittagaqarluartumik aammalu minnerunngitsumik kalaallit oqaasiinik, kulturiannik avannaanilu inooriaatsimik ilisimasaqartumik atorfinitsitsisinnaagamik.

- Sivso Dorph-ip atorfinitsinneqarneratigut qularineqanngilaq kommunimi nutaassami suliassaqarfiup tamarmiusup kivinnissaanut ataqatigiisitsilluarsinnaasumik atorfinitsitsigut, Ikaarsaariarnermut Ataatsimiititaliap Siulittaasuaq Palle Jerimiassen isumalluarluni oqarpoq. 
Asseq: Palle Jerimiassen, Hans Eriksen, Bea Mølgaard Lennert, Sivso Dorph aamma Christian Jensen. Asseq ippassaq Sivso Dorph-ip Avannaata Kommuniani Pisortaanertut atorfinitsinneqarnerata qullersaqarfimmi sulisunut nalunaarutigineqarnerani assilisaavoq.