airplanebooksbriefcase business cogs cross election entertainment fish house law lockmedicalpeopleselfservices socialtax

Borgmesterip oqalugiaataa. Kommuni nutaaq nalliuttorsiorfik. 26/1-18

26. januar 2018

Tikilluaritsi.

Nuannaarutigaara Avannaata kommuniani kommunalbestyrelse sinnerlugu Avannaata kommuniata pilersinneqarnerata ullorsiutigineqarneranut tikilluaqqusinnaagassi.

1. Januar 2018 kommunerput nutaaq Avannaata kommunia pisortatigoortumik atuutilerpoq.

Avannaata kommunia pilersinniarlugu ilungersuuteqarsimasut tamaasa qutsavigerusuppakka pilluaqqullugillu.

Avannaata kommuniani innuttaasut Avannaata kommuniani kommunalbestyrelsi sinnerlugu pilluaqquakka angorusutartik piviusunngortimmassuk.

Innuttaasut piumasarinikuuaat Qaasuitsup kommunia avinneqassasoq, oqartussaaqataaneq annerusoq angorusullugu, sumiiffimminnilu namminneerlutik ilusilersueqataaneq oqartussaaqataanerlu angorusullugu.

Tamannalu oqariartuut tusaallugu pingaarnerpaatillugulu Avannaata kommuniani kommunalbestyrelsip siornali 2017-mi aprilimi qinersereernerup kingornatigut suliaq ilusilersorlugu suliarisimavaa.

Avannaata kommuniata pilersikkiartuaarnerani suleqataasimasut qutsavigaagut immikkullu qutsavigerusuppagut Qaasuitsup kommuniani kommunalbestyrelsiumasut aammalu sulisuusimasut, qujanaq pilersitsiniarnermi suleqataalluarlusi ilusilersueqataasimagassi.

Piareersarneq annertooq atorsimavarput qulakkeerusullugu innuttaasut ikaarsaarnermi ajornerusumik sullinneqalinnginnissaat aamma siunissamut siunnerfiit tunngavissaasa inissinnissaat angorusullutigu.

Nuannaarutigaaralu suliat iluatsittumik naammassineqarsimasutut nalilersinnaagakkit. Avannaata kommunia aallartippoq massakkullu siunnerfiit suleriaasissallu suliarineqareersimasut atorlugit sulinerput aallartereerparput.

Kommunalbestyrelsip suleqatigiilluinnarni isumaqatigiillunilu siunnerfiit ataatsimoorullugit akuersaarnikuusaat massakkut piviusunngorterarlugit aallartereerpagut, sumiiffinni Illoqarfinni sisamani aqutsisut pilersinneqalerput, aammalu nunaqarfinni aqutsisut akisussaaffilersorneqarlutik ingerlalissallutik.

Illoqarfinni Nunaqarfinnilu aqutsisut kommunalbestyrelsimit aalijangerneqarsimasumik missingersuuteqassapput namminneq aqutaminnik. piffimmilu ilusilersuinerit aqutsisut ingerlatarilissavaat.

Innuttaasut kommunitsinni akuutinnerulernissaat qitiuvoq, innuttaasut oqartussaaqataasutut siunnerfilersueqataasutullu misigisimasut pilersikkusuppagut, angorusukkatsigu kommuni tamatta piginneqataaffigisarput, kommuni inuuffigissallugu,suliffigissallugu, najungaqarfigissallugulu pilerinartoq.

Oqartussaaqataanermik misigisimaneq uterteqqissavarput tamatta kivitseqatigiinnissarput suleqatigiissutigissagatsigu.

Kommunalbestyrelsimiit piumasaraarput innuttaasut kommunimut saaffiginnittut sullinneqarnermikkut malunnaatilimmik pitsanngorsaavigineqassasut. Innuttaasut saaffiginnereeraagamik misigisimasassapput ikiorneqarsimallutik aammalu ingerlariaqqinnissaminnut siunnersorneqarsimasutut misigisimassallutik.

Kommunimi sulisut pinginnaasamikkut qaffassarneqassapput inuttullu nukittorsarneqarlutik, piffinnilu assingiinngitsuni suliassanut tunngatillugu annertunerusumik aalijagiisinnaassuseqalissallutik.

Piareersarneq isumalluarfiusoq suleqatigiiffiusorlu siunnerfiillu isumaqatigiilluinnarni anguniarneqartut atuutilernissaat ullormiit ullormut tamarmik piviusunngortinneqarsinnaanngillat, piffissamik atuissuugut aamma atuisariaqarpugut piviusunngortitsiniarnermi, naatsorsuutigaarput ukioq 2018 ikaarsaariarfittut atussallutigu.

Aallartinneq isumalluarnartoq ikaarsaariarfigereerparput, ullut tamaasa suliartornissatsinnut qilanaartarpugut suliassamut tunniusimalluinnarluta ataqatigilluutalu suliarput nuannarigatsigu.

Sulisut kivitseqataanissamut piumassusillit suleqatigilerlugit assut nuannerpoq pissarsinarlunilu, taamaattumik siunnerfitta ilagilluinnarpaat avannaata kommunia suliffiussasoq pilerinartoq pissanganartorlu. Sulisugut ilagalugit tamanna anguniassallugu ilungersoqatigiinnissarput qularinngilluinnarpara. Innuttaasut ilissi pitsaanerpaamik sullinneqarnissarsi anguniassavarput.

Utoqqartatsinnut meeqqanullu isumassuineq pitsaaasoq, qanilaarneq inussiarnersuunerlu, ilaatigut oqaaseqanngikkaluarluni qungujunneq naammattarpoq, kommunitsinni tikilluaqqusisuunitsinnut ilisarnaatitut atortigit, kommunitta orniginartuunissaa anguniarlugu.

Nalunngilarput suliassat unammillernartorpassuarnik ilaqartut aamma unammilligassat takkuttarumaartut, sulisullu qinikkallu suliassat kivitseqatigiiffigalugit aaqqiiviginiartarumaarpugut.

Isumalluarfigaara innuttaasut oqartussaaqataanerata annertusarneratigut peqataaneq, akuuneq, ilusilersueqataaneq annertusissasoq, upperaara innuttaasut sumiiffimminni namminneq peqataatinneqarnermikkut annertuumik innuttaasut susassaqartinnerannut peqataatinneqarneranullu iluaqutaaumaartoq.

Pisariaqartipparput peqataanissarsi allannguiniarnitsinni, ajorunnanngilaq naammanngilaq, pitsaanerpaaq sullissineq anguniartuassavarput, inuttut angusaqarusussuseqarneq, allannguerusussuseqarneq, pitsaanerpaamik meeqqanut atugassaqartitserusunneq siunnerfigissavarput, tamannalu aatsaat angusinnaavarput peqatigiilluta aaqqeerusulluta suleqatigiikkutta.

Allannguerusunneq oqartussaaqataarusunneq annertunerusoq nammineerluta amerlanerussuteqagaarluta kommunip avinnissaanut taasinermi piumanikuuarput massakkullu tamanna piviusunngortissinnaalerparput oqartussaaqataalluta peqataalluta pitsanngorsaaqataagutta.

Akisussaaqatigiinneq kivitseqatigiinnerlu ikioqatigiinnerlu kommunitsinni nukittorsartuassavagut, kommuniuvugut periarfissagissaartoq pitsaasumillu inuuneqalernissamik ataatsimoorfiusussaq anguniaqartussarlu.

Siunissami sapiissusersi pisariaqartipparput, massakkut inuunerput qiviarutsigu ukiunullu qulinut kingumut qiviarutta inuunerput massakkut allaaneroqaaq, alloriarnerpassuit siuariarnerillu takusinnaavagut, piniartuunermiit aalisarnermut alloriarneq annertooq piffissami tassani ingerlanneqarsimavoq, ilaqutariit atugaat allaaneroqaat, teknikkimi sakugut allaaneroqaat, massakkullu alloriarneq nutaaq ingerlaffiginialerparput, ataatsimoornissarput suleqatigiinnissarpullu pisariaqarluinnarpoq, suleqatigiikkutta angusassagut killeqanngillat, allannguerusunnermut sapiissusersi uani atorluarussiuk siunissarput neriulluarnarpoq isumalluarnarlunilu.

Qinnuigaassi periarfissaq tingulluarlugu alloriarnermut nutaamut peqatigissagitsigut.

Ullumikkut kommunip nutaap pilersinneqarneranut kommunitta iluani sumiiffinni tamani malunnartitsiniarneqarpoq, neriuppunga nuannisarfiulluarumaartoq nuannaarfiullunilu, tamassi peqataalluarisi.

Avannaata kommuniani kommunalbestyrelsi sinnerlugu avannaamiut tamassi pilluaqqoqqippassi Avannaata kommuniata pilersinneqarnerani.

Qujanaq.