airplanebooksbriefcase business cogs cross election entertainment fish house law lockmedicalpeopleselfservices socialtax

Qinersisartunut iluareqqusaarneq kusanaatsoq

13. september 2018

Inuit Ataqatigiit mittarfiliornissanut siunnersuutaa atorsinnanngilaq. Inuit Ataqatigiit saqqummiussaat nunarput pillugu saqqummiussaanngilaq, Nuummi qinersisartutik kisiisa eqqarsaatigalugit taamatut oqariartorput, paasinarsivoq Inuit Ataqatigiit nunatta sinnerata inerisarneqarnissaa siunertarinngikkaat. Soorlu tamanna IA-kut aqutsineranni siornatigut takusareernikuungipput.

Tupannaqaaq sooq ikerinnaq IA-kut taamannak siunnersuuteqarnersut, naak 2015-mi aningaasanut inatsimmut akuersinermi taaseqataareernikuullutik, aalijangernerlu suli taanna massakkumut atuuppoq.

Paatsoorsimarpasippaat sooq mittarfiit allilerniarneqarnersut, tassami siunertaavoq nunatsinnut aningaasarsiornikkut pitsanngorsaanissaq aningaasanillu nutaanik pilersitsinissaq. Nuuk kisiat aallaavigalugu mittarfinnik pilersitsisoqassappat Nuummiit Nuummullu atorfillit angalanerannut aningaasaliineruvoq aningaasanillu nutaanik pilersitsinerunani.

Ilulissat mittarfiat sanaartorneqarpat aningaasat nutaat pilersinneqartussaapput, nunatsinnut tamarmut iluaqutaasussamik. Takornariaqarnikkut periarfissat annertusarnerisigut aningaasat pilersinneqassapput, aalisakkallu avammut niiverutiginerisigut aningaasat nutaat pilersinneqassapput. Suliffiit nutaat pilersiortorneqarpata akileraarutaat nunatsinnut iluaqutaalissapput.

Nunaqavissut sanaartornermut atorneqarnissaat isumaqatiginarpoq, kisianni pissutsit qiviaraanni tamanna piviusorsiornerunngilaq. Massakkut tamatta sanaartornermut suliaqartussanik ujartuivugut, sanaartukkat kinguaattooqqapput sulisussanik amingaateqarneq peqqutaalluni, taamaattumik sanaartornerni avataaniit suliartortunik atuinissaq saneqqunneqarsinnaanngilaq.

Naalakkersuisut mittarfiit pillugit siunnersuutaat aalijangiusimaneqartariaqarpoq, allanngortinnagu, apeqquserneqarsinnaanngitsumik taanna pilersaarut nunatsinnut tamarmut iluaqutaasussaammat, piffinnut ataasikkaanuinnaanngitsoq. Aammami taanna tunngavigalugu Naalakkersuisut siulittaasuata statsministerillu isumaqatigiissummik atsiugaqarput, atsiornermilu aallaaviutinneqarput Nuuk aamma Ilulissat, aningaasassaqareersut kinguarsarneqassanngillat massakkuuvoq pilersitsinissaq mittarfiit avataatigut periarfissat nutaat pilersinneqartussat inuiaqatigiit tamarmiusut iluaqutigisussaavaat.

Aningaasaliiniarlutik peqataarusuttut kasuttorput peqataarusullutik taakkualu tatiginninnerat apparsassallugu piffissaanngilaq.

Inussiarnersumik inuulluaqqusillunga
Palle Jerimiassen
Borgmester