Avannaata Kommuniani najugaqarfinni tamani siorna immap naqqatigut kabelip tallineratigut internettimut pitsaanerulersumut ammaassisoqarpoq. Innuttaasunut inuutissarsiorfimmullu assut nuannarineqartumik.
Ullumikkut internetti sukkasooq aserujaatsorlu suliffippassuit, ilanngullugu kommunip pisariaqartilluinnarpaat. Soorlu qarasaasiakkut nunap assingi, assersuutigalugu NunaGis sulinerup aalajangersimasumik ilagilersimavaat, aammalu innuttaasut inuutissarsiorfillu ilitsersorneqassagaangata, aamma nutaanik sanaartornissanut nunaminertanik atugassiisoqassatillugu taakku pisariaqartilluinnarpagut. Qarasaasiaq atorlugu sulineq tassaavoq siunissaq, tassaavorlu aamma aqqut Namminersorlutik Oqartussanit uagutsinnit suliaqarfigeqqusaasoq.
Ajoraluartumik ulloq 21. januaarimi immap naqqani kabelerput kittorarneqarpoq. Assorsuaq alianarpoq, kisiannili marsip qaammataata naaneranit immap naqqani kabelip, taamaalillunilu internettip sukkasuup atuuteqqilernissaanik Tele-Postip nalunaaruteqarsimanera nuannaarutigaara.
Taamanikkornissaanulli sakkortusaavikkut attaveqarneq assut pitsaasuunngitsoq naammagiinnartariaqarparput.
Immap naqqani kabeli pilersinneqanngikkallarmalli sakkortusaavitoqaq kommunimi suli eqqaamavarput. Ajorpallaanngilarmi. Maannakkut atuukkallartutut aaqqiissutaasumut naleqqiullugu pitsaanerujussuarmik atuuppoq. Ajornartorsiuteqarpallaarani qarasaasiakkut nunap assingi, soorlu NunaGis suliaqarfiusinnaapput. Aamma ingerlatsivinnik, soorlu Netflix’imik atugaqarnissamut kommunimi innuttaasorpassuarnut periarfissaavoq. Soorlu maannakkut pitsaassusilimmik sakkortusaavikkut attaveqarfimmik naammaginniinnartariaqassanerput uanga aamma Avannaata Kommuniani innuttaasut allarpassuit paasiuminaatsipparput.
Siunissami immap naqqani kabelip kittoraqqinissaa qularutiginngilara, taamaattumillu taamanikkornissamut tamatuma qanoq isumagineqassanera pillugu Tele-Postimit nalunaaruteqarfigineqarnissarput pisariaqartillugu isumaqarpunga.
Ullumikkut attaveqarnermut tunngatillugu internetti ullumikkut pingaaruteqarnerpaat ilagaat. Nunami suliffeqarfiit isertitaqarnerpaat ilaat Avannaata Kommuniani inissisimapput, taakkulu internettimik aserujaatsumik assorsuaq pisariaqartitsipput. Taamatuttaaq siunissami ilinniagaqartitsinermut aaqqissuussivik ippoq, aammalu attanniagassasut sulisartuusut.
Taamaattumik internettikkut attaveqarfiup sukkassusianut naleqqiullugu nunami pitsaavallaanngitsutut innuttanngornermut sutigulluunniit akuerisinnaanngilara. Assigiinnassavaa ineriartortitsinerup siuariarnerullu amigaataaneranik akuerinninneq.
Taamatut pisoqartillugu Tele-Post ajornartoorfimmi upalungaarsimaffeqartariaqarpoq. Aammalu assingatut taamatut pisoqarnernut Tele-Post ajornartoorfimmi upalungaarsimanermut pilersaaruteqartariaqarpoq. Avannaata Kommuniani innuttaasunut sinniisutut pilersaarut taanna assut takorusuppara, aamma isornartorsiuisutut iseqarlunga atuarusullugu, kinguneqartitsisussanik siunnersuuteqarnissara siunertaralugu. Tamanna ilutigalugu siunissami immap naqqani kabelip kittoraqqinnissaanut aarleqqutaasumik qanoq ililluni Telep annikillisitsiniarneranut pilersaarutaa takorusuppara. Anguniagaqartuunngitsutut isigissagukku isummama saqqummiunnissaa qularutigissanngilarsi. Taamaaliornissannut innuttaasunut pisussaaffeqarpunga.
Nunami Avannaata Kommunia pingaarutilittut ingerlatseqataasuunera taakkartoqqissavara. Ilulissani akunnittarfinni unnuisitagut 73.000-iupput, nunattalu aalisakkanik avammut tunisaasa annerpaartaat imartatsinni pisaasarput. Internettimut tunngatillugu attaveqarfittat siunissamut nunami sumiiffinni allanisulli taamaaqataanik qularnaarneqarnissaa pingaartuuvoq.
Inussiarnersumik inuulluaqqusillunga,
Palle Jerimiassen
Borgmesteri