airplanebooksbriefcase business cogs cross election entertainment fish house law lockmedicalpeopleselfservices socialtax

Meeqqeriveqarnermut akit allanngortinneqanngillat

Sermitsiaq.AG-mi eqqunngitsumik paasissutissiisimaneq tunngavigalugu erseqqissarneqassaaq Avannaata Kommuniata meeqqeriveqarnermut akigititai kommunalbestyrelsip ataatsimiissutissaanit peerneqarnikuummata. Taamaammat Sermitsiap siunnersuummik kommunalbestyrelsimi marlunngormat eqqartuisoqarsimagaanera eqqunngilaq.
28. november 2019
Meeqqeriveqarnermut akigititat Peroriartortitsinermut Ataatsimiititaliami eqqartorneqarput aammalu aningaasaqarnermut ataatsimiititaliamut eqqartugassatut ingerlateqqinneqarlutik, aningaasaqarnermulli ataatsimiititaliami aalajangerneqarpoq eqqartugassaq kommunalbestyrelsimi eqqartorneqassanngitsoq.

Peroriartortitsinermut Ataatsimiititaliap meeqqeriveqarnermut akigititassanik allannguinissamut tunngavilersuutaasa amigarineqarnerat Aningaasaqarnermut ataatsimiititaliap eqqartugassamik oqaluuserisassanit peersineranut peqqutigineqarpoq aammalu oqaatigineqarluni kommunalbestyrelsimi eqqartorneqassappat minnerpaamik aningaasatigut kingunerisinnaasai misissuivigineqartariaqartut. Taamaasilluni meeqqeriveqarnermut akit maannakkutut annertussuseqarlutik allannguuteqanngillat.