airplanebooksbriefcase business cogs cross election entertainment fish house law lockmedicalpeopleselfservices socialtax

Isumasioqatigiinneq pissarsiffiulluartoq

Avannaata Kommunia kommunalbestyrelsimi ilaasortanut, pisortanut, ingerlatsisunut allanullu aqutsisunut isumasioqatigiissitseqqammerpoq, tassanilu kommunip aningaasaqarnera suliniutaalu killiffissiorneqarput. Suliffeqarfinnit avataaneersunit saqqummiisut peqqinnissap tungaatigut silallu pissusaata allanngoriartornera pillugu siunissami suleqatigineqalersinnaanerinut tunngaviusinnaapput.
6. december 2019

Kommunip 2020-mut missingersuusiaasa aappassaaneerlugit eqqartorneqanngitsiarneranni isumasioqatigiinneq ulluni pingasuni sivisussuseqartoq pivoq. Saqqummiisoqareernerata kingorna peqataasut apeqquteqarsinnaatitaapput, saqqummiisullu akissuteqarnerminni itisiliillutik nassuiaateqarsinnaasarput.

Regine Bidstrup Inuit Ataqatigiit sinnerlugit kommunalbestyrelsimi ilaasortaasoq isumasioqatigiinnermi peqataasut ilagaat. Taanna ikaarsaariarnermut ataatsimiititaliap nalaani maannakkullu kommuniusumi isumasioqatigiittarnerni assingusuni ilaasareersimavoq.

- Tamatta ataatsimiititaliani tamani ilaasortaanngilagut, taamaammat ingerlatsivinni assigiinngitsuni suliaqarfiit killiffiillu isumasioqatigiinnerni paasisaqarfigisinnaasaratsigit iluartaqaaq, soorluttaaq aamma kommunitta aaqqissuussanikkut killiffia paasisaqarfigisinnaasaripput. Ataatsimut isigalugu illoqarfinni nunaqarfinnilu suliniutit assigiinngitsut aammalu aningaasaqarnikkut qanoq inissisimanerput paasisaqarfigisinnaallugu iluaqaaq, Regine Bidstrup kommunalbestyrelsimi ilaasortaq aammalu Teknikkeqarnermut Ataatsimiititaliami, Ilaqutareeqarnermut Ataatsimiititaliami kiisalu Aalisarnermut Piniarnermullu Ataatsimiititaliami ilaasortaasoq oqarpoq.

Ingerlatsiviit susassaqarfimminni killiffimminnik oqariartuuteqarnerisa saniatigut avataaneersunik marlunnik saqqummiisoqarpoq. Naalagaaffiup ataani innuttaasut peqqissuusaat pillugu ilisimatusarfimmit Kalaallit Nunaanni innuttaasut peqqissusaannik misissuisitsisimaneq pillugu saqqummiisoqarpoq, tamatumanilu Avannaata Kommuniani misissuisimernermi inernerusut immikkut sammineqarput. Danmarkimi silasiorfimmi DMI-mit saqqummiinermi Ilulissani oqaluttuarissanermi siunissamilu silap pissusaata allanngoriartornera sammineqarpoq. Saqqummiinerit tamarmik siunissami kommunimik suleqateqalersinnaanermik tunngaviliisuusinnaapput, soorlu assersuutigalugu silap pissusaata allanngoriartornerata inuussutissarsiutigalugu aalisartuunermut qanoq sunniuteqarsinnaanera pillugu aammalu innuttaasut peqqissusaannik misissuinerit peqqissutsip tungaatigut pinaveersaartitsiniarnerup tungaatigut suleqatigiissutigineqarsinnaallutik.

Allattoq assiliisorlu: Káte Hansen, khan@avannaata.gl


Avannaata Kommuniani politikerit, pisortat, ingerlatsisut aqutsisullu ulluni pingasuni isumasioqatigiipput.