airplanebooksbriefcase business cogs cross election entertainment fish house law lockmedicalpeopleselfservices socialtax

Illoqarfinni nunaqarfinnilu nutarterinissanut aningaasaliinerit

Qaanaami qatserisartut biilitaarnissaat illoqarfimmilu qatserisarfiup illutaata nutarteriffigineqarnissaa, nunaqarfiit arfineq-pingasut ATV-taartinneqarnissaat, tupersuaq aalisarnermik saqqummersitsisoqarnissaani atorneqartussaq, Uummannami aqquserngit asfaltilersorneqarnissaat kiisalu Upernavimmi anartarfilerisut biilitaartinneqarnissaat. Tamakkuupput kommunalbestyrelsimmi ilaasortat juuni 29-ani ataatsimiinnerminni nutarterinissamut akuersissutaat. Kommunalbestyrelsimi aningaasaliissutini ilassutissatut 6,8 millioner koruunit akuersissutigineqarput aammalu 960.000 koruunit immikkoortortani marlunni aningaasaliissutit ikilisinneqarnerisigut aaneqarlutik.
30. juni 2020

ATV-nik pisiniarnissaq kommunalbestyrelsimi 2019-imi oktobarip 18-iani ataatsimiinnermi akuersissutigineqarpoq. 960.000 koruunit ATV-nik pisiniarnissamut atugassat missingersuutinit nuussinikkut nassaarineqarput, tamatumanilu Ilaqutareeqarnermut aammalu Ineriartornermut immikkoortortat aallerfigineqarput. Taamaasilluni nunaqarfinni Saqqami, Qaarsunni, Ikerasammi, Saattuni, Aappilattumi, Innaarsunni, Tasiusami aammalu Kullorsuarmi atuarfinni pedelit imertarnerminni ikummatissamillu assartuinerminni sulinerat oqinnerulersinneqassaaq.

Upalungaarsimaniarnikkut Qaanaami immikkoortortaq 2.399.369 koruuninik aningaasaliiffigineqarpoq, taamaasillunilu upalungaarsimanissamut atatillugu inatsisinik aalajangersakkanik eqquutsitsinissaminut periarfissaqalissaaq. Aningaasat biilinik qatserutinik 1.810.000 koruuninik akeqartunut atorneqassapput, aningaasaliissutinilu ilassutit 589.369 koruunit qatserisarfiup illutaata iluarsarneqarnissaanut aammalu atortorissaarutinik allanik pisinissamut atorneqassapput.

Aningaasaliissutini ilassutit allat marluk oqaluuserisani ataatsimoortillugit saqqummiunneqartut tassaapput 3 millioner koruunit Uummannami aqqusinernik asfaltilersuinissamut atugassat aammalu 800.000 koruunit Upernavimmi anartarfilerinermi biilisinissamut atugassat.

Aningaasaliissutini ilassutissatut 600.000 koruunit tupersuarmik saqqummersitsinerni atortagassamut pisinissamut aamma kommunalbestyrelsimi akuersissutigineqarput. Tupersuaq 2020-mi oktobarip arfernernaniit arfineq-pingajuata tungaanut aalisarneq pillugu saqqummersitsinissami Ilulissani pisussami atoqqaarfissiortinneqassaaq.

Allattoq: Káte Hansen, khan@avannaata.gl