Tallimanngorneq 26. Juni 2020 Saattuni qatserisartumut Isak Mathiassen-imut, Dronning-ip nersornaasiutagaa, ukiuni 50-ini qatserisartutut sulisimanermi nersornaat, tunniunneqarpoq. Nersornaasiineq Saattut atuarfiani ingerlanneqarpoq.
Nalliuttorsiortoq qatserisartuni sulilersimavoq 1964-mi, nersornaallu ullulerneqarsimalluni 01. September 2014. Assigiinngitsunillu peqquteqartumik nersornaat aatsaat ukioq manna tunniunneqarpoq, tassani Uummannami qatserisartoqarfiata ittua Isak Pjettursson aammalu Avannaata Kommuniani Upalungaarsimanermut pisortap ataani atsiortup, nunaqarfinnut angalanerat iluatsillugu.
Taamaattumik Isak Mathiassen-ip qatserisartutut sulisimanerani ukiut eqqortut tassaapput 56-it, tamannalu inuttaanut, suleqataanut aammalu ilaqutaanut ulloq pingaaruteqarsimaqaaq.
Kalaallit nunaani nunaqarfinni qatserisartunik aqutsisuuneq imaannaanngittaqaaq; tassani inuttaqarniarnikkut aammalu atortunik peqquteqartunik unimmillernartuulluni, tassami qatserisartut ilaatigut inuussutissarsiutertik aalisarneq pinianerlu ingerlatartik aamma paarisussaammatigit. Atortullu aserfallannginnissaat paaqqutarinerilu aamma annertuumik akisussaaffimmik tigusisarlutik.
Nersornaasiinermi ilaatigut peqataapput nunaqarfimmi aqutsisoq, illoqarfimmiit allaffissornikkut suleqataasumit, qatserisartoqataasut, minnerunngitsumillu nuliaa Aaninnguaq Mathiassen aammalu taakkunannga erngutaasut erngutaaqqiutaasullu.
Ullormi pingaaruteqaqisumut Isak Mathiassen pilluaqqungaarparput, nuannequtigisimallugulu nersornaasiineq tunniunneqarmat 56-inik ukiullip, Upalungaarsimanermut Pisortamit Jens Dahl-mit.
Inussiarnersumik inuulluaqqusillunga
Jens Dahl, Avannaata Kommuniani Upalungaarsimanermut pisortaq
