airplanebooksbriefcase business cogs cross election entertainment fish house law lockmedicalpeopleselfservices socialtax

Sermersuumi ataatsimiititaliameersut tikeraarnerat isummersoqatigiinnertut ilusilerneqartoq


Kommuneqarfik Sermersuumi Meeqqanut Ilaqutariinnullu ataatsimiititaliami ilaasortat nunatta avannaani paasissassarsiorlutik angalanerminni Avannaata Kommunianut tikeraarnerat isummersoqatigiinnertut ilusilerneqarpoq.
14. september 2020
Saamerlerniit: Aka Grønvold, Ilinniarnermut Ingerlatsivimmi pisortaq,Ane Egede Mathæussen, ataatsimiititaliami ilaasortaq, Uju Petersen, MeeqqanutIlaqutariinnullu ataatsimiititaliami siulittaasoq, Misu Benjaminsen, allatsi,Inge Olsvig Brandt, ataatsimiititaliami ilaasortaq, Gerda Fleischer,immikkoortortami aqutsisoq kiisalu Karen Lund Fleischer, ingerlatsisoq.
Ataatsimiititaliami ilaasortat ukiumut ataasiarlutik nunanut allanut paasisassarsiornissaminnut periarfissaqartut nunani allani coronap atugaanera pissutigalugu ukioq manna nunatta avannaanut paasisassarsiorniarlutik aalajangersimapput. Ataatsimiititaliami ilaasortat Kommune Qeqertalimmut paasisassarsioreerlutik Avannaata Kommunianut aamma tikeraarput.

Tikeraartit saqqummiisullu illuatungeriillutik kommuniminni ajornartorsiutaasinnaasunik imminnut apersulermata paasisassarsiorluni tikeraarneq isummersoqatigiinnertut ilusilerneqapallappoq. Taamaasilluni meeqqanik angerlarsimaffiup avataanut inissiisarneq, siusinaarluni soraarnerussutisiaqartarneq aammalu suliffissarsiortunik sulilersitsiniaaneq, angerlarsimaffeqanngitsut, akissarsiffiup nalaani sulisussaaleqisarneq allarpassuillu pillugit isummanik paarlaasseqatigiittoqarpoq.

Tikeraarneq pissarsinartoq

- Taamatut isumasioqatigiissinnaaneq assut pissarsinarpoq, kommunimmi akornanni isummersoqatigiissinnaaneq maqaasinartarmat, soorlu KANUKOKA-mi isummersoqatigiittarsimanitsitut ittut, Ane Egede Mathæussen, Kommuneqarfik Sermersuumi Meeqqanut Ilaqutariinnullu ataatsimiititaliami ilaasortaq oqarpoq.

Avannaata Kommuniani borgmesteri Palle Jerimiassen aamma pisortaqatigiit amerlanersaat Uummannamut paasissutissiiartorlutik angalagamik Kommuneqarfik Sermersuumit tikeraartinik ataatsimeeqateqarsinnaasimanngillat. Ilaqutareeqarnermut Ingerlatsivimmi ingerlatsisuusoq Karen Lund Fleischer ingerlatsivimmi suliat pillugit saqqummiivoq saniatigullu Ineriartornermut Ingerlatsivimmi pisortaq Aka Grønvold kommunimi sulinermi killiffinnik ilassuteqartarpoq.

Ilaqutareeqarnermut Ingerlatsivimmi suliat pillugit saqqummiinnginnermi ataatsimiititaliami ilaasortat kommunimi suliniutit pillugit paasisaqarput. Tamatumani ilaatigut Hotel Arcticip kitaa-tungaani illoqarfiup ilassutissaa aamma Kangiata Illorsuanik sanaartornerup ingerlarsornera aammali arsarnerit pillugit ilisimatusarfissamik pilersaarutit corona pissutigalugu uninnganerat pillugit paasissutissiivigineqarput.

Kommuneqarfik Sermersuumit tikeraartit tassaapput Meeqqanut Ilaqutariinnullu ataatsimiititaliami siulittaasoq Uju Petersen aamma ilaasortat marluk Inge Olsvig Brandt aamma Ane Egede Mathæussen kiisalu pinaveersaartitsineq pillugu immikkoortortami aqutsisoq Gerda Fleischer aamma allatsi Misu Benjaminsen. Ataatsimiititaliami ilaasortat marluk Knud Mathiassen aamma Hans Jukku Noahsen paasisassiorluni angalanermi peqataanngillat.

Allattoq assiliisorlu: Káte Hansen, khan@avannaata.gl