airplanebooksbriefcase business cogs cross election entertainment fish house law lockmedicalpeopleselfservices socialtax

Innuttaasut 201-t nualluummut akiuussutissamik Sermermiuni kapitittut

Ilulissani piorsarsimassutsikkut illorsuaq Sermermiut sapaatip akunnerata naanerani nakorsiartarfiliarineqarmat innuttaasut utoqqaanerusut allallu peqqissutsimikkut aarlerinartorsiorsinnaasutut nalilerneqartut nualluummut akiuussutissamik kapitipput.
22. oktober 2020

Akiuussutissamik kapuineq Ilulissani napparsimmaveqarfiup, piorsarsimassutsikkut illorsuup Sermermiut-p aammalu Avannaata Kommuniata akornanni suleqatigiilluni aaqqissuunneqarpoq, kommunimilu sulisut sisamat ulluni kapuiffiusuni suleqataapput.

- Pinaveersaartitsiniarneq pingaaruteqartoq ingerlanneqarpoq. Aaqqissuussaq piorsarsimassutsikkut illorsuarmit kommunimiillu tapersersorneqarluartoq naammagisimaaqaarput. Tamatuma takutiinnarpaa pingaaruteqarluartunik suleqatigiissuteqarsinnaasugut, Peter Vedsted, Peqqinnissaqarfik Avannaani nakorsat qullersaat oqarpoq.

Ingerlalluarluinnarpoq
Innuttaasut 201-t arfininngornerup sapaatillu ingerlaneranni akiuussutissamik kapitipput. Innuttaasut assigiinngisitaartut akiuussutissamik kapitipput; 65-inik ukioqalereersimasut tamarmik, anigorneqarsinnaanngitsunik nappaatillit 65-it ataallugit ukiullit, pualavallaartut kiisalu sapaatit akunnerini aqqanilinni naartoreersimasut.

Akiuussutissamik kapuineq ernumanaateqanngitsumik pitsaasumillu isumagineqarsinnaaniassammat piorsarsimassutsikkut illorsuarmi Sermermiuni init aaqqissuulluarneqarsimapput. Innuttaasut kapitikkiartortut matu aalajangersimasoq iserfigeriarlugu, inuttut paasissutissatik nalunaarsorteriarlugit, kapiteriarlutik matukkut allakkut anisarput.

- Ingerlalluarluinnarpoq, pisussarlu suleqataasunit tamanit eqqarsaatigilluarneqarsimavoq. Neriuppunga aappaagu taamatut aaqqissuusseqqissinnaassalluta, Jeanette Leer Normann Kjeldsen Ilulissat napparsimmavianni nakorsaatilerisutut immikkut ilinniagalittut atorfilik oqarpoq.

Nualluummut akiuussutissamik kapuineq peqqinnissaqarfiup inunnut Covid-19-imik tunillatsissagaluarunik aarlerinartumik nappaateqaleratarsinnaasunut pinaveersaarniutitut neqeroorutigaa.

Peqqinnissaqarfik Avannaani nakorsat qullersaat Peter Vedsted ilisimatitsivoq, illoqarfinni allani akiuussutissamik kapuinissamut ukioq manna aaqqissuussinissamut periarfissaqarsimanani, illoqarfiilli akiiuussutissamik pisimanersut paasiniarlugu attavigiortorniarpai.

Akiuussutissalersuilluni kapuinermi assit ataani takukkit.

Allattoq: Káte Hansen, khan@avannaata.gl
Assit: Ilulissat napparsimmaviat


Akiuussutissamik kapuinermi utaqqisarfimmi naatitanik imigassanillu Pisiffiup tunissutaanik sassaalliisoqarpoq.


Piorsarsimassutsikkut illorsuarmi Sermermiuni pisussanik ataqatigiissaarisoq Nukannguaq Mathiesen init agguataarneqarnerannik titartakkap saavani.


Nakorsaatilerisutut immikkut ilinniagalik Jeanette Leer Normann Kjeldsen aamma napparsimmavimmi oqalutsi Jens Jerimiassen.


Maani akiuussutissamik kapuisoqarpoq.


Kommunimi sulisut sisamat aamma piorsarsimassutsikkut illorsuarmi pisussanik ataqatigiissaarisoq ulluni kapuiffiusuni suleqataapput. Saamerlermiit: Makkak Lundblad, Johanne Svendsen, Haldora Thor Jeremiassen, Rakel Reimer Jensen aamma Nukannguaq