airplanebooksbriefcase business cogs cross election entertainment fish house law lockmedicalpeopleselfservices socialtax

NAKUUSA-p aalajangersagai borgmesterimut tunniunneqartut

NAKUUSA-mit aalajangersakkanik Naalakkersuisunut borgmesterinullu tunniussisoqarnerani nunalu tamakkerlugu video aqqutigalugu ingerlanneqarnerani Ilulissani sinniisuutitat peqataapput. Atuartut aalajangersakkanik Avannaata Kommuniani borgmesterimut Palle Jerimiassenimut tunniussipput.
20. november 2020

- Aalajangersakkat atuarnissaat qilanaaraara aammalu piuviusunngortinneqarnissaat qilanaaralugu, taamatuttaaq suleqatigiittarnerput nuannaarutigiuaannarpara, borgmesteri Palle Jerimiassen NAKUUSA-p sinniisuutitaanut kommunalbestyrelsimi ilaasortat issiaviinik tiguaasimasunut oqarpoq.

Taamaaseriarluni borgmesteri meeqqat paasisinnaasannik saaffiginnippoq nassuiaallunilu:

- Atuartuugallarama ilissituulli atuartut siunnersuisooqatigiivini ilaasortatut aallartippunga kingornalu klubimi siunnersuisooqatigiinni, klubimi siulersuisuni, kollegiemi siulersuisuni, ilinniarfimmi siulersuisuni, KANOKOKA-mi kommunalbestyrelsimilu ilaasortatut ingerlaqqillunga maannalu borgmesteritut inissisimallunga. Taamaammat ilissi siunissami qanoq ingerlajumaarnissarsi qilanaaraara.

Aalajangersakkat meeqqat novembarip tallimaani ataatsimeersuartinneqarneranni pilersinneqartut immikkoortukkaanut ”Kinaassuseq, assigiinngiiaassuseq aammalu nittartakkatigut attaveqaatit” aqqanilinnik aalajangersagartalinnut agguataagaapput. Ilaatigut meeqqat aalajangersakkatigut kissaatigaat nunatsinni piorsarsimassutsit assigiinngitsut pillugit videoliat amerlanerussasut, qinngasaarisarneq akiorniarlugu iliuuserisat amerlanerussasut, attaveqatigiittarfinni qanoq pissusilersortoqartarnissaanik oqallittoqarnissaa allatigullu kommunini piviusunngortinneqartussanik aalajangersagaliorput.

Meeqqat novembarip tallimaani ataatsimeersuartinneqarneranni borgmesterip Palle Jerimiassenip NAKUUSA-p Avannaata Kommuniani sinniisuutitaanut ilaatigut oqaatigaa, Meeqqat inuusuttullu kommunalbestyrelsissaannik pilersitsinissaq kommunalbestyrelsimit aalajangiunneqaqqammersimasoq, taamalu meeqqat suli tusaaniarneqarnerulerlutik oqariartuutaat kinguneqartinneqartalerumaartut.

Ullormi pisumi assilisat ataani takukkit.

Allattoq assiliisorlu: Káte Hansen, khan@avannaata.gl