Kalaallit Nunaannit Danmarkimut nuukkuit, akuulernissamut suliniut pitsaaliuinertalik ILIK iluaqutigalugu ikaarsaarneq oqinnerusinnaavoq.
Misilittakkat naapertorlugit nunamut allamut nuunneq oqitsuinnaaneq ajorpoq. Inuit allaanerupput, kulturi allaaneruvoq, pissutsillu ilaatigut paasiuminaassinnaasarlutik. Taamaammat ILIK-mmit tapersersorneqarnikkut danskit inuiaqatigiivini akuullualertinniarneqassaatit.
ILIK-mmit tapersersortaasut piumassutsiminnik suliaqartuupput taamatullu tapersersuisarneq taamaallaat Københavnimi neqeroorutaasarpoq. Danmarkimi sumiiffimmut allamut nuussaguit, Kalaallit Illuat qaninnerusat attaveqarfigissagit innersuussutaavoq. Kalaallit Illui ikiortissarsiorfiusinnaasut ukunaniipput København, Aalborg, Århus aamma Odense.
ILIK-mmut attaveqaruit najugarilikkanni paasissutissat pisariaqartut, imaluunniit nunamut allamut nuunnermi inooqataanikkut ilungersunarsinnaasut pillugit tapersersortimik piumassutsimik suliaqartumit ikiorteqartinneqalersinnaavutit.
Danmarkimut nuunnermi piffissaq siulleq ajornartorsiorfiunerpaasarpoq. Københavnimut nuunnissat siunniussimagukku, aallaqqaataaniilli ikiorneqarniassagavit aallartinnak ILIK attavigiuk.
Attaveqarnissamut immersuiffissaq uani immersorsinnaavat
Tapersersortivit makkuninnga ikiorsinnaavaatit:
• Københavni pillugu aamma Danmarkimi pissutsit pillugit paasissutissiineq
• Tapersersuineq, siunnersuineq ilitsersuinerlu
• Ilinniagaqarniarnermi aporfiusinnaasut
• Piffissami siullermi kiserliortoqartillugu angerlarsertoqartillugulu ikorfartuineq
ILIK-mmi suliniummut aqutsisoq suleqatigalugu pisussaq pilersaarusiorneqassaaq piffissallu ingerlanerani allanngorarsinnaalluni. Piffissaq atorneqartoq qaammataasinnaavoq qaammatilluunniit arfiniliusinnaapput, pisariaqartitsineq apeqqutaalluni. Pingaarnerpaavorli inoqatinik naammattunik attaveqalernissavit, imaluunniit namminiilernissavit tungaanut tapersersorteqartinneqassagavit. Piffissalli ingerlanerani akisussaaffimmik tigusinissat siunniuteqqassavat.
Inuunerpit sinnera tamaat Danmarkimi najugaqalernissat ukiuniluunniit arlalinni najugaqarnissat apeqqutaanngilaq. Isumaqaruit ILIK ilinut iluaqutaasinnaasoq, saaffiginninnissannut tikilluaqqusaavutit.