Peqqissutsimik siuarsaanikkut, pinaveersaartitsinikkut aamma katsorsaanikkut innuttaasut peqqissusaata isumagineqarnissaat peqqinnissaqarfimmit suliassarineqartut ilagivaat. Innuttaasut Kalaallit Nunaanni inuit allattorsimaffiannut nalunaarsorsimasut nakorsiarnissaat, unitsitaanissaat aamma katsorsartinnissaat akeqanngilaq.
Innuttaasut kikkulluunniit peqqinnissaqarfimmiit sullinneqarnissamut pisinnaatitaaffeqarput.
Tamanna ima paasineqassaaq, illit innuttaasutut peqqinnissaqarfimmit akeqanngitsumik sullinneqarsinnaavutit makku pineqartillugit:
• Peqqissutsit pillugu paasissutissanik pissarsiniarsinnaavutit paarinissaanullu ikiorneqarlutit aamma napparsimanaveersaarnissaq anguniarsinnaallugu
• Napparsimaguit nakorsarneqarsinnaavutit
• Pisiniarfinni nakorsaatinik tuniniaaffiusuni pisiarineqarsinnaanngitsunik nakorsap allagartaliineratigut nakorsaatinik pisinnaavutit
• Nualluummut akiuussutissamik kapitissinnaavutit
o soraarnerussutisiaqaruit, nakorsarlu isumaqarpat pisariaqartoq
o puallunneq ilinnut navianartuuppat, assersuutigalugu allamik nappaateqarlutit sanngiikkuit
• Iluaqusersuutinik atorsinnaavutit, soorlu ajaappissat
• Nakorsaq isumaqarpat pisariaqartitsisutit pisuni immikkut ittuni nujaasaqarnissamut allatigulluunniit timip ilaanut taarsiummik pinissamut tapiiffigineqarsinnaavutit
Oqalutseqarneq
Oqalutseqarnissamut pisinnaatitaaffeqarputit.
Tamakkiisumik imaluunniit ilaannakortumik akiliuteqarneq
Peqqinnissaqarfiup sullississutai tunngaviatigut tamaasa akeqanngillat. Tamannalu ima isumaqarpoq, innuttaasut kikkulluunniit napparsimalerunik misissortinnissaminnut, katsorsartinnissaminnut aamma paaqqutarineqarnissaminnut pisinnaatitaaffeqarput. Sullississutilli ilaat ataasiakkaat tamakkiisumik imaluunniit ilaannakortumik illit nammineq akiligassarivatit.
Ingiallortaaneq
Allaaserisaq takuuk Napparsimasunik angallassineq
Nakorsaatit niuertarfinni pisiassat
Nakorsaatit niuertarfinni pisiassat taakkuupput nakorsamit allagartalersortariaqanngitsut. Nakorsaatit tamakku tunngaviatigut nammineq akilertassavatit. Inuunerpit sinnera tamaat nappaateqaruit, 18-it inorlugit ukioqaruit imaluunniit utoqqalinersiaqaruit, niuertarfik aqqutigalugu nakorsaatit pisiassaasartut peqqinnissaqarfik aqqutigalugu akeqanngitsumik pisinnaavatit.
Nalornissuteqaruit najukkanni peqqinnissaqarfimmut attaveqarsinnaavutit.
Akiuussutissamik kapitittarnerit
Meeqqat akiuussutissamik kapitittarnissaannut nalinginnaasumik pilersaarutaareersut imaluunniit nakorsap peqqussutigisaasa saniatigut akiuussutissamik kapitinnerit allat nammineq akilissavatit.
Nakorsap oqaaseqaataa
Nakorsap oqaaseqaataanik peqqissutsivit misissornissaanut atugassamik pisariaqartitsiguit, assersuutigalugu inuunermut sillimmateqarnissamut atatillugu, imaluunniit biilernermut allagartartaarniaruit, misissortinneq nammineq akilissavat.
Allattugaatit
Illit pillutit allattugaatit assilineri pissarsiarerusukkukkit, najukkanni napparsimmavimmut qinnutigisinnaavatit. Assilineri akitsuuteqarput akiligassannik.
Illerfimmik assartuussineq
Allaaserisaq una takuuk Toqukkut qimaguttumik angerlamut assartuussineq