ILULISSAT AVANNAATA ILLOQARFITTUT INERIARTORNERA

Ilulissat ullumikkut nunatsinni takornariartarfiit siuttorereerpaat, illoqarfiullu
avannaani nutaamik mittarfissuarmik kiisalu takusaaffiusinnaasumik,
Isfjordcenter-i, Ilulissat kangerluata immikkuullarissup eqqaani inissisimasumik
aammalumi nunarsuarmi pitsaanerpaat ilagisaattut ilusilersorneqarsimasumik
pilersitsisoqarnissaanik pilersaaruteqartoqarmat, siunissamut isumalluarneq angivoq
– ineriartornerullu taassuma piviusunngortinnissaanut angusaqarusussuseqarneq
piumassuseqarnerlu aamma taamaapput.

Uani quppersakkami siunertaasoq taamaalilluni tassaavoq, ineriartortitsinissamut
periarfissat immikkuullarissut taakku qanoq iliorluni pilersaarusiorneqassanersut
atorneqassanersullu pillugit oqallinnissamut sinaakkusiornissaq.

Tunngaviusumik Imersuup aamma Nuugaarsuup eqqaani Ilulissat avannaatungaani
illoqarfiup immikkoortortassaa nutaaq. Tassunga ilanngullugu Kangerluarsummi
mittarfiup nutaassap qanittuani nutaamik talittarfimmik inuussutissarsiortullu
inissaannik pilersitsinissamik periarfissaqarpoq.

Siunissaq ungasinnerusoq isigalugu illoqarfik Kangerluarsuup avannaatungaani
ineriartortinneqarnissamut periarfissaqarpoq.

Quppernerni tulliuttuni illoqarfiup immikkoortortassaanut nutaamut
aaqqissuussaanikkut pilersaarut saqqummiunneqarpoq – tassa ima paasillugu,
illoqarfiup immikkoortortassaa qanoq ilusilersorneqarsinnaanersoq qanorlu Ilulissat
illoqarfiata Sermermiunut kujataanut atatillugu nunaqarfimmut avannamut
Oqaatsunut qanoq ineriartortinneqarsinnaanera pillugu siunnersuut.

Palle Jerimiassen, borgmester

Avannaata Kommunia

Ineriartortitsinissamut pilersaarutip siunertaa tassaavoq illoqarfioreersup avannaani, ingammik tatsip imeqarfiup aamma Nuuaarsuup eqqaanni illoqarfiup ineriartortitaanissaanut periarfissaasut toqqammavissaannik aalajangersaanissaq. Pilersaarutip periarfissaareersut, aammalu mittarfiup takkuttussap nassatarititaatut ineriartornissamut periarfissat tamakku erseqqissaavigai. Ilusissatut pilersaarut illoqarfimmut, kommunimut, kiisalu allanut Ilulissat aamma Avannaata Kommuniata siunissaanut siuarsarnissaanullu ilaanissamik kissaateqartunut iluaqutaasussamik siunissami ineriartortitsinissamut ataatsimoorussatut tunngavissamik pilersitsisussatut sakkussatut atulertussaassaaq.

Pilersaarutip imai

Ilulissat avannaanut sammivilimmi illoqarfimmik ineriartortitsinissamut periarfissat pilersaarutip nassuiarpai. Ilaatigut attaveqarfinnut pitsanngorsakkanut tunngavigisassat atugassiarineqarput, ilanngullugu allatut qinigassatut mittarfimmut aqqusineq. Pilersaarummi mittarfiup ungasinngisaani inuussutissarsiorfinnut sumiiffiit umiarsualivillu tamarmik nutaat atugassiarineqarput, soorlulusooq aamma inissiaqarfinnik illoqarfiullu qeqqani sumiiffiit, ilaatigut nutaanik akunnittarfiliornissamut periarfissallit atugassiarineqarlutik. Maannakkut illoqarfiup ineriartortinnissaanut, aammalu imeqarfimmut pallitsaaliukkamut killeqarfiup allanngortinneratigut, eqqaavissuullu atorunnaarsinneratigut periarfissat qulaajaavigineqarput.

Ingerlariaqqinnissaq

Ineriartortitsinissamut pilersaarut aallaavittut atorlugu kommunalbestyrelse namminersorlutik oqartussanik oqaloqateqarnermi ilaalersinnaassaaq, aammalu pisortanit namminersortunillu aningaasaliisartunik suleqateqarluni siunissami illoqarfiup ineriartortinnissaanut suliniutinik aallartisaasinnaalissalluni.

Pilersaarut immikkuualuttortanut pituttugaanngilaq, paarlattuanilli illoqarfiup siunissami ineriartortinnissaanut najoqqutassatut isigineqarnerussaaq. Siunissami immikkoortortat ilaannut pilersaarutit ataasiakkaat tamarmik immikkoortillugit tamanut ammasumik tusarniaassutaajuartassapput.