Sisamanngornermi februaarip 22-ani borgmesterip Qaanaami suleqatigiissitai pilersinneqarput apriilip 11-ata tungaanut suligasuartussat.
Qaanaami inuttut atukkatigut, avatangiisitigut, sunngiffimmi susassaqarniarnikkut, kulturikkut iliuusaasinnaasutigut allatigullu innuttaaqataasunut pitsaasumik suliniutigineqarsinnaasunik ukiorpassuarni amigaateqartuarsimavugut.
Borgmester Palle Jerimiassenip takusinnaajuarsimavaa avataaniit suleqatigiissitanik iliuusissanik siunnersuuteqartitsisarnerit annertunerusumik sunniuteqarneq ajortut. Taamaattumik borgmesteri suleqatigiissitaliorpoq kommunalbestyrelsimut naalakkersuinikkullu ingerlatsisunut allanut siunnersuusiortussanik Qaanaarmiunik inuttalersukkanik.
Taakku sunilluunniit siunnersuusiorsinnaassapput inuiaqatigiinnut Avanersuarmiunut iluaqutaasinnaasunik.
Ataatsimiititaliami uku inuttaapput: Avatannguaq Imina, Helle Holm Petersen, Mika Oshima Etah, Masauna Holm Petersen, Dan D Normann, Arrutaq Qujaukitsoq kiisalu Toku Oshima.
Suleqatigiit neriulluarfigaavut.
Ikinngutinnersumik inuulluaqqusillunga
Palle Jerimiassen
Borgmesteri
