airplanebooksbriefcase business cogs cross election entertainment fish house law lockmedicalpeopleselfservices socialtax

TUSARNIAANEQ: Uummannami illunik B-19A-mik, B-19B-mik aamma B-19C-mik isaterinissaq pillugu

1. marts 2018

Tunuliagut
Uummannami illunik B-19A-mik, B19B-mik aamma B19C-mik isaterinissaq pillugu qinnuteqaammik Avannaata Kommunia tigusaqarnikuuvoq. Matumani taarsiullugu quersuarmik/qerititsiveqarfimmik, umiarsualivimmi siunertamut atasussamik sanaartornissaq kissaatigineqarpoq (nunap assingani inissisimaffik takuuk).
Qinnuteqaatigineqartoq qitiusoqarfimmi inissisimavoq, tamannalu isumaqarpoq, tassani taamaallaat ataatsimoorussatut siunertanut atuineq pisinnaasoq, tassaasinnaappullu atuarfik, meeqqeriviit, kulturimut timersornermullu atortulersuutit aamma tamat siunertaat taakkununnga assingusut. Tamatuma saniatigut immikkoortoq immikkut ittumik eriagineqartussatut toqqarneqarnikuuvoq.

Uummannami qaleralinnik tunisisarnermi quersuit imaqqortussusiinik allisaasoqarnissaa pisariaqartinneqarmat, qinnuteqaat taanna tiguneqarsimavoq. Umiarsualivimmi piusumi inissisimaffiusinnaasut amigaataanerat pissutigalugu, umiarsualiviup nunaminertaata avataani quersualiornissaq/qerititsiveqarfiliornissaq kissaatigineqarpoq, nunap assingani takutinneqartutuut. Qinnuteqaateqartup kissaatigaa, qerititsiveqarfik pingajuata affaanik portussuseqartunngorlugu sananeqassasoq, 7,5 m-isut portussuseqartumik, illorsuullu silataa qisunnik qaleriissitanik qallerneqassaaq.
Qinnuteqaat akuerineqassappat, B-19A, B19B aamma B19C immikkoortorlu eqqaa, kiisalu immikkoortoq eriagineqartussaq, qitiusoqarfiusutut atorunnaarsinneqassaaq taarsiullugulu umiarsualiveqarfittut siunertamut atugassiissutigineqassalluni.

Immikkoortup maannakkut atorneqarnera eriagineqarnissaalu aallaavigalugit, saaffiginnissut una maannakkut tamanut tusarniaassutigineqarpoq, taamaalillunilu innuttaasut soqutigisallillu allat, suliap tusarniaassutigineqarneranut akissuteqaateqarnissamut piarfissaqartinneqassallutik. Matuma kingorna Namminersorlutik Oqartussanut, Aningaasaqarnermut Akileraartarnermullu Naalakkersuisoqarfimmut, suliaq inaarutaasumik aalajangiiffigisassanngorlugu nassiunneqassaaq.

Immikkoortumi illut ilusilersorneqartarnerat
Qitiusoqarfik tamakkerlugu, immikkoortutut immikkut ittumik eriagineqartussatut toqqarneqarnikuuvoq. Immikkoortumi inissisimapput ilaatigut, niuertoqarfeqarnerup nalaaniilli illut pisoqaanerpaat kiisalu oqaluffik katersugaasivillu. Tamatuma saniatigut immikkoortumiipput illut ujaqqanik issunillu qarmagaq 1920-ikkunni sananeqarsimasoq, oqaluffiup eqqaani nunaminertamiittoq. Taakku illut pisoqqat aamma taakku nunallu eqqaaniittup ataatsimoortumik isikkuliinerat, immikkoortup illullu eriagisassatut toqqarneqarnikuunerannut toqqammaviliisuunikuupput.
Naatsiiaasivik (B-19A), illutut eriagisassatut toqqarneqarsimasoq sorsunnersuup taamaatinneqarnerata kinguninngua sananeqarnikuuvoq, tamatumunngalu Grønlandskommission-i illunik titartaasartunut piumasaqaateqarnikuusimavoq, sumiiffinni illulioriaaseq inooriaaserlu atugaasut nalinginnaasuusut isiginiarneqassasut.
1948-ip kingorna illoqarfinnik ineriartortitsineq annertooq aallartinneqarpoq aalisarnermillu inuussutissarsiuteqarneq aallartilluni. Naatsiiaasivik, niuertoqarfimmi illut nutaanngitsut kujataatungaanni inissisimavoq immikkoortullu illut assigiinngiiaartut nutaanngitsut saqqumilaartippai, tassanilu naatsiiaasivik ippoq, ujarassuarnit qupisanik issunik akunnilersukkanik sananeqarsimalluni. Illup qangaanerusoq illulioriaatsitut atugaasimasoq takussusiiffigaa, tassungalu ilanngullugu illoqarfiup tunngavilerneqarneraniillu ulloq mannamut ineriartortitsinerup ingerlasimanera takussusiiffigalugu.
Illulioriaatsip atorneqartup, illut ujaqqanik issunillu qammakkat sinneruttut ilaat ataaseq aamma oqaluffiup eqqaani illut mikisunnguit sananeqarsimasut saqqummersippai.

Tusarniaaneq pillugu paasissutissat nalinginnaasut
Tamanut tusarniaaneq sapaatit akunnerini pingasuni ingerlanneqassaaq, ulloq 26.02.2018-imiit - 19.03.2018-imut, piffissami tassani akerliliissutinik, oqaaseqaatinik siunnersuutinillu saqqummiussisinnaavutit.
Tusarniaanermut akissutit allakkatigut nassiussinnaavat, qarasaasiakkut allakkatigut uunga plan@avannaata.gl. Akissutit illit najukkanni Sullissivimmut aamma tunngiussinnaavat imaluunniit kommunimut nassiullugu.

Tusarniaanermut akerliissutissaqassaguit imaluunniit oqaaseqaateqassaguit, taakku kingusinnerpaamik kommunimut tunniunneqassapput nassiunneqarlutillu ulloq 19.03.2018.

Avannaata Kommunia
Pilersaarusiornermut immikkoortortaq
Rådhuset
Postboks 1023
3952 Ilulissat
plan@avannaata.gl
Tlf.: 947655

TUSARNIAANEQ.pdf

Bygningstegninger.pdf