airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaata aningaasaqarnera tamatingoortuusariaqarpoq

25. maj 2018

Kalaallit Nunaata aningaasaqarnera ukiorpassuarni aalisarnermit aamma Danmarkimit tapiissutinit immersorneqarpoq. Ullumikkut pissutsit allannguallapput, takornariartitsineq tassanngaanniillu isertitat aningaasaqarnitsinnut sunniuteqalersimammata.
Nunarsuarmi niuffaffimmi aalisakkat akii suli uagutsinnut assut aalajangiisuusarput, avammulli nioqqutigisarput qujanartumik ingerlalluarpoq. Isumalluutit pigisagut piujuartitsisut piumaneqarput, tamannalu uagutsinnut suliffippassuarnik tunisivoq.
Patajaassuserli aammalu siunissami aningaasaqarnikkut toqqavissamik pilersitsiniarutta inuussutissarsiorfiup ataasiinnaap pisariaqartitaassannginnera tamatta nuannaarutigisinnaassavarput. Soorunami uuliasiornermik aatsitassarsiornermillu inuussutissarsiorfimmi aallartitaqarluartoqassappat soorunami tamanna iluassaaq. Utaqqiisaali takornariartitsisoqarfik, aningaasaqarnitsinnut aamma kissaatigisatsinnut, siunissamullu anguniakkatsinnut ilorraap tungaanut sunniuteqarsinnaasoq pitsanngorsaavigisinnaasarput tamassa.

Kalaallit Nunaat aningaasaqarnermigut namminersorusuppoq. Namminersornerlu pillugu isuma soorunami aningaasaqarnermik aserujaatsumik tunngaveqassaaq. Taamaattumik takornariartitsinermik suliffissuaqarfiup annertusarnissaa pisariaqarpoq. Aatsitassarsiornermik uuliasiornermillu suliffissuaqarfimmut naleqqiullugu periarfissat isumalluutillu tigoriaannaapput. Sanilerput Island, ukiumut 1,5 millioninik takornariartoqarpoq. Tamaani takornariartitsineq inuutissarsiutini pingaarnerpaavoq, taamaalillunilu nunami isertitanut pingaarnerpaatut najoqqutaalluni. Pinngortitami assissaqanngitsutut migisisassaatitta allanit pissarsivigitinnissaannut periarfissaqarnerput, aammalu takornariartitsinermik suliffissuaqarfitta annertuumik allisarnissaa kikkut tamarmik isumaqatigaat. Takornariartitsinermilli suliffissuaqarfik annertusarniarlugu kissaateqarutta attaveqarfitta annertusarnissaata aallartinnissaa pisariaqartipparput, ingammillu Nuummi, Ilulissani Qaqortumilu mittarfiit allineqarneri anguniagaqarfigalugit suliaqarfigisariaqarlutigit.

Nuummi, Ilulissani aamma Qaqortumi mittarfinnik allisaqarnernut tunngatillugu ataasinngorpat Inatsisartuni oqaluuserineqartussaq ’aningaasaliinissamut inatsit’
Avannaata Kommuniani kommunalbestyrelsip tapersersorsimavaa. Kalaallit Nunaata aningaasaqarneranut ilorraap tungaanut sunniuteqarsinnaaneranik, tamatsinnit piumasarineqartumit tamanna isigineqassaaq. Siunissami annertuunik unammillerfissaqarpugut. Utoqqaat amerliartussapput, pisortanilu immikkoortumut aningaasartuutit innuttaasunut annertunerusumik kiffartuussisoqalernera malillugu annertusiartussapput. Inuusuttut nunatsinnik qimatsisinnagit tamaaniiginnartinnissaat aamma pisariaqarpoq. Tamaani aalisarnermik periarfissat isertitallu naammanngillat. Taamaattumik suliarisassat nutaat pisariaqarpoq, taamaalilluni takornariartitsinermit isertitat annertusarneqarsinnaammata.

Ataasinngorpat ’aningaasaliinissamut inatsit’ suliarineqalerpat partiit tamarmik Kalaallit Nunaata siunissaanik takorluugaqarnissaat takorusussavara. Mittarfiit allinngikkutsigit Kalaallit Nunaata suminngaanniit isertitassarsiornissaa assut takujuminaatsissavara. Mannali toqqaannartumik isertitaannarnut tunngasuunngilaq. Aamma suliffeqartitsineq ilinniagaqartitsinerlu pineqarput, aammalu Kalaallit Nunaanni inuunissamut innuttaasunut nutaanik anguniagassanik tunniusiviginissaat pineqarpoq. Takornariartitsinermik suliffissuaqarfiup annertusarnerata suliffiit nutaat nassatarissavai. Inuusuttortagullu suliffeqartitsisumik, isumalimmillu inuunermik tunisisinnaasumik takornariartitsinermik inuutissarsiorfiup iluani ilinniagassat pissanganartut arlallit takusinnaassavaat. Tamanna nunamut tamarmut iluaqutaasinnaavoq. Taamaattumik Avannaata Kommuniani borgmesteritut Inatsisartut nutaat ataasinngorpat Kalaallit Nunaanni mittarfiit allinissaasa piviusunngortinnissaannik taasinissaat kaammattuutigaara.

Ikinngutinnersumik inuulluaqqusillunga
Palle Jerimiassen
Borgmesteri