airplanebooksbriefcase business cogs cross election entertainment fish house law lockmedicalpeopleselfservices socialtax

Borgmesterit: Aningaasanut inatsisissaq allanngortittariaqarpoq

Naalakkersuisut sipaarniutaasut pillugit kommuninut sipaarutissanik ingerlatitseqqiinnarnerat, Naalakkersuisut aningaasatigut akisussaassuseqanngitsumik iliornerattut takutitsineruvoq, taama isumaqarput borgmesterit tallimaasut.
4. september 2018

Naalakkersuisut aningaasanut inatsisissatut siunnersuut sapaatip akunnerani kingullermi saqqummiummassuk Qeqqata Kommuniani bormesterimit iluarineqanngilaq. Malik Berthelsen isumaqarpoq, Naalakkersuisut aningaasanut inatsisissatut siunnersuuteqarnerminni Namminersorlutik Oqartussat isumagisassarpassuisa ilaat kommuninut isumagisassanngortiinnaraat.

 

”Allaanngilaq aningaasaqarneq ataqatigiittariaqanngitsoq Naalakkersuisunit siunniunneqarsimasoq. Kommunit tamanna isumagiumaarpaat", taama oqarpoq Malik Berthelsen (S).

 

Kisimilu naammagisimaarinninngilaq. Aningaasanut inatsisissaq borgmesterinit tallimaasunit isornartorsiorneqarpoq.

 

Kommuninut tapiissutinik agguaanermi 20 millionit koruuninik ikilisaaffigineqarput, ikilisaaffigineqarnerminnilu suliassat kommuninut amerlanerusut tunniunneqarlutik. Ukioq manna assersuutigalugu ineqarnermut tunngasut Namminersorlutik Oqartussaniit kommuninut tunniunneqassasut pilersaarutaavoq. Taamatuttaarlu kinguaassiuutitigut kannguttaatsuliorfigineqarsimasut iliuuseqarfigineqarnissaat Naalakkersuisunit aallartinneqartussaavoq, tamatumalu sulissutiginissaani kommunit annertuumik piumaffigineqarput.

 

”Nutaanik suliassaqalernerput nuannaarutigaarput. Najukkatsinni politikkimik suliaqalerpugut pissutigalugu suliassat taama ittut suliarerusukkatsigit. Naalakkersuisulliuku illuanillu pituttorluta suliassat amerlanerusut suliareqqugaat, taamaaliornerminnilu aningaasat siunertanut atugassat ikilisarlugit”, taama oqarpoq Kommuneqarfik Sermersuumi borgmesteri, Asii Chemnitz Narup (IA).

 

Borgmesterittaaq uparuarpaat, Naalakkersuisut kommuninut pitsaasumik isumaqatigiissuteqarsimanertik unioqqutillugu iliuuseqartut. Tamatumani pineqarpoq DUT-mik taallugu isumaqatigiissutaasoq.

 

”Ukiut qulit sinnerlugit ingerlanerini suliat aningaasartaqartarnissaat isumaqatigiissutigisarsimavarput, kisianni taamaakkunnaarsimarpasippoq. Naalakkersuisut aningaasaqarnikkut akisussaasutut imminnut taakkartorsinnaasut, aningaasartuutit kommuninut ingerlateqqiinnartarunikkit ingasappallaaqaaq”, taama oqarpoq Avannaata Kommuniani borgmesteri, Palle Jerimiassen (S). 

 

Aningaasanut inatsisissap saqqummiunnerani kommunit sipaarniuteqarnissaat pingaaruteqartuusoq Naalakkersuisunit erseqqissaassutigineqarpoq. Sipaarniuteqartareerpugut, borgmesterit tallimaasut aalajangersimarpalullutik erseqqissaatigaat. 

 

”Kalaallit Nunaanni Naatsorsueqqissaartarfimmit kisitsisit ersarilluinnarput, Namminersorlutik Oqartussat allaffissuani sulisut amerliartorput kommuninilu sulisut taamaaginnakannerlutik. “Namminersorlutik Oqartussat aningaasartuutigisartakkatik qanoq inissisimanersut qimerloornerusariaqarpat, kommunit aningaasartuutigisartagaannut sanilliussinermikkut” taama oqarpoq Kommune Kujallermi borgmesteri, Kiista P. Isaksen (S).

 

Borgmesterit tallimaasut aammattaaq isumaqarput, Naalakkersuisut sutigut sipaaruteqartoqarnissaa eqqarsaatigilluaqqaartariaqaraat. Allaffissornermi suliaqartut imaluunniit innuttaasunik qanimut sullissisut matumani pineqassappat?

 

”Kommunimi sulisut innuttaasunik kiffartuussisussaallutik sulisuupput. Meerartavut paarivavut, atuarfiit ingerlappavut utoqqartavullu paaqqutaralutigit. Namminersorlutik Oqartussat allaffissornermik suliaqartuupput. Suliassavitta aallutarinissaat qulakkeertussaavarput – tassa innuttaasut pitsaasumik kiffartuunnissaat, taama oqarpoq Kommune Qeqertalimmi borgmesteri, Ane Hansen (IA).