airplanebooksbriefcase business cogs cross election entertainment fish house law lockmedicalpeopleselfservices socialtax

Pissartanngortut nalliuttorsiutigisarnissaat

4. april 2019

Avannaata Kommuniata aallartisarnerminili siunertaraa kommunitsinni innuttaasut Nunatsinni pissartanngorniunnerni pisortatigoortuni peqataasunit pissartanngortoqarsimatillugu persuarsiutiginnilluni nalliuttorsiutiginnittarnissani, kiisamilu maanna taanna siunertaq Ilulissani piviusunngortilerparput, tallimanngorpat 5/4-19 nal. 14-17 ukioq manna maannamut Iluliarmiut pissartanngorsimasorpassuit nalliuttorsiutiginiarlugit kommuni kaffillissimmat, una aaqqissuussineq Ilulissaniinnaq ingerlanneqartartussaanngilaq.

Avannaata Kommuniata peqatigiiffiit, Nunatsinni pissartanngorniunnernut pisortatigoortumik ingerlanneqartunut peqataasarnerat tapersersorpaa, aammalu peqataasunit pissartanngortoqartillugu tulluusimaarutigisarlugu.

Taamaattumik Avannaata Kommuniata siunertaraa peqatigiiffiit ingerlatani suugaluarnersuni pissartanngorsimatillugit imaluunniit pissartanngortortaqarsimatillugit ilassinnittarnissani, aamma taamaalilluni innuttaasut peqatigiiffilerinernut timersornernut allanullumi soqutiginninnerat qaffassaaqataaffigissagamiuk.

Siunertaq:
Avannaata Kommuniata ilissinnittarnermini siunertaraa pissartanngorsimasut kommuniminnit tapersersorneqarlutik misigisimasarnissaat, tassalu tamanna pissartanngortoqarsimatillugu nalliuttorsiutigineqarluni malunnartinniarneqartassaaq, sumiiffimmi innuttaasut tamaasa peqataatillugit.
Kommunimit pissartanngorsimasunik nalliuttorsiutiginninnerit ukiumut marloriarlugit ingerlanneqartarnissaat siunertaavoq, tassa nunarput tamakkerlugu pisortatigoortumik pissartanngorniuutitsinerit naammassineqarsimaleraangata, siulleq upernaakkut aappaalu ukiakkut.

Pissartanngorsimasut nalliuttorsiutigisarnissaanni suleriuseq:
Illoqarfinni nunaqarfinnilu pisortatigoortumik Nunatsinni pissartanngorniunnerni pissartanngorsimasunik nalliuttorsiutiginninnerit ingerlanneqartassapput.
Pissartanngorsimasut sumiiffigisaanni nalliuttorsiutiginninnerit ingerlanneqartassapput imalu aaqqissuunneqartassallutik:
1. Peqatigiiffiit, pissartanngorniunnerit naammassereersimalerneranni, kommunimi sumiiffigisaminni Peqqinneq Sunngiffimmut immaqaluunniit nunaqarfimmi kommunip allaffianut attaveqarlutik pissartanngorsimasut nalunaarutigisassavaat.
2. Sumiiffimmi Peqqinneq Sunngiffimmiit nunaqarfinnilu kommunip allaffianiit pilersaarusiorneq piareersarnerlu ingerlanneqartassapput.
3. Sumiiffimmi Kommunalbestyrelsemut qinigaq imaluunniit nunaqarfimmi aqutsisut siulittaasuat kommuni sinnerlugu oqaaseqartuusussatut attavigalugit piareersarnermi suleqatigineqartassapput.
*Ilulissat borgmestereqarfiummat, Ilulissani borgmesteri attavigineqartassaaq.

Ilulissani nalliuttorsiutiginninneq tulleq 6. september 2019 pissasoq naatsorsuutigineqarmat, pissartanngortoqaqqissimassappalli aatsaat.